Skol di baile kanto i aktuashon “Mi teater” ta bai habri su porta pa tur edat
Willemstad, – Kòrsou ta bai konosé un skol di teater nobo. Mi teater ta un skol di teater pa tur edat i ta bai kuminsá ku diferente kurso. Entrante djarason awor por inskribí pa por sigui e diferente kursonan ku lo bai tin. Kada kurso ta dura 4 luna i ta kulminá ku un presentashon pa públiko. E promé kurso ta start dia 2 di aprel i ta kulminá dia 2 yüli dia di bandera ku un tremendo show. E sede di Mi teater lo ta den “kura di arte” na Pietermaai. Mi teater ta spesialisá den drama, baile, kanto i músika. Ta bai tin vários dosente konosí ku lo sòru pa bo wòrdu bon prepará pa kada presentashon. E kursonan ta wòrdu parti den diferente grupo di edat.
Mucha 5-8 aña i 9-12 aña. Tiner 13 – 17 aña Hóben adulto 18 – 30 aña Adulto 30 pa 60 Penshonado 60+
Si bo ta gusta aktua, Mi teater ta siñabo for di skibi bo propio poesia pa presentá, te ku bo mes pelíkula pa bo aktua den dje. Abo huntu ku bo dosente lo bo bai krea obra teatral, presentashon i te asta pelíkula. For di komedia, drama akshon i mas. Despues di kuater luna lo bo ta kla pa presentá riba esenario òf den bo promé pelíkula.
Baile for di folklor te ku moderno. Lo bai tin diferente dosente spesialisá riba diferente estilo di baile. E dosentenan lo traha riba bo abilidat di move i siña bo tur téknika nesesario pa bo por dominá e arte di baile. Ora ku tur hende ta dominá e bailenan lo bai traha riba un show di baile pa presentá na vários evento.
Tambe ta bai tin lès di baile pa tur hende ku ke siña baila for di folklor, latino i moderno pa tur edat.
Kanto i músika. Bo gusta kanta, bo ke perfekshoná bo talento i haña oportunidat di presentá na diferente evento? òf traha den un produkshon òf show? Mi teater ta bai brinda bo e oportunidat ei. Aparte di siña i haña un bon training di kanta lo bo siña dominá e arte di músika tambe for di lesa not te ku toka un instrumènt. Asina ku bo partisipá na e kursonan di Mi Teater, na final bo lo ta parti di kualke un di e produkshonnan ku Mi teater lo bai produsí.
Djarason dia 9 di 5or pa 7or, djabièrnè dia 11 i djasabra dia 12 di 2or pa 4or por pasa tuma informashon i inskribí na Kura di Arte kaya Jonge wacht 8 na Pietermaai (Kaminda ántes tabata Albertus College). Pa mas informashon por yama na telefon: 520-8949. Òf mail miteaterkorsou@gmail.com.