Kòrsou a bira un di e destinashonnan internashonal mas aksesibel pa e turista kolombiano

WILLEMSTAD – 12 di mei 2017 – Resientemente kolombianonan interesá den hasi un biahe pa e aria di Karibe por a partisipá na un evento organisá den Parque 93 na Bogota. Un di e paisnan ku a resaltá durante e evento aki ta Kòrsou. Interesadonan por a probechá di ofertanan ku deskuentonan super atraktivo hasiendo un biahe pa Karibe mas aksesibel posibel. E kampaña #NosVamosDeVacas (Nos ta bai ku fakansi), ta un yamada na e kolombiano pa tuma e desishon lihé pa bishitá un di e paraisonan den Karibe entre kual ta figurá Kòrsou.

E evento a konta ku partisipashon di Samy Bessudo, Presidente di Agensia di Biahe Aviatur, ku a komentá tokante kresementu di sektor turístiko na Colombia. El a indiká ku e motibu di kresementu no ta únikamente debí na e aparente stabilisashon di dòler merikano, sino tambe pa motibu di diferente otro faktornan ku ta hasi mas fásil pa e turista kolombiano biaha; por ehèmpel dor di eliminashon di visa, no únikamente pa Europa, sino tambe pa destinashonnan mas serka, manera Kòrsou.

Di su parti, e representante di Kòrsou na Colombia, Victor Manuel Dapena, a komentá di e oumento den bishitantenan di Colombia pa Kòrsou i e importansia di esaki. Ademas, el a invitá reporteronan ku tabata presente pa bin sera konosí ku Kòrsou ku tin hopi di ofresé inkluyendo un diversidat di atrakshonnan pa akomodá diferente segmento turístiko. E evento a finalisá ku un rifa den kual partisipantenan tabatin chèns di gana un biahe pa 3 destinashon den Karibe, entre nan, Kòrsou.