WILLEMSTAD – 2 di aprel 2013:- Ku gran satisfakshon Ofisina di Turismo di Kòrsou (CTB) ta anunsiá ku pa di dos aña konsekutivo Kòrsou ta keda skohé komo destinashon faborito den Karibe i ta risibí e 2013 About.com Readers’ Choice Awards. Por kòrda ku algun siman pasa a invitá pueblo di Kòrsou pa vota riba e websáit www.voteforcuracao.com p’asina duna Kòrsou e votonan nesesario pa un biaha mas gana e enkuesta aki. Tal manera ku a keda anunsiá, dia 27 di Mart último e resultadonan a bira konosí.  “Bèrdat nan ta bisa ku union ta hasi forsa”, esaki di akuerdo ku Sr. Ghatim Kabbara, direktor di CTB. “Esaki ta e mesun union ku ta kuantifiká e resultadonan ku nos tin den nos sektor turístiko aki na Kòrsou i tambe nos esfuersonan den eksterior pa sigui merkadeá nos isla komo un destinashon faborito. E rekonosementu aki ta koroná nos esfuersonan, pues tur partner den industria por sinti nan mes orguyoso”, asina Kabbara a finalisá. Kòrsou ta keda rekonosé den  kategoria di ‘Favorite Caribbean Destination’. Kòrsou su 35 playanan bunita, su historia i herensia kultural a kapta atenshon di mundu un biaha mas. Nos isla, mihó konosí pa su beyesa natural abundante, sitionan eksepshonal pa hasi buseo i otro deportenan akuátiko ta den faboritonan di mas di 13,000 hende ku a vota pa Kòrsou. Di akuerdo ku ehekutivonan di CTB, esaki ta aun mas motibu pa sigui fortalesé e kampaña ‘Dushi Hende’ i kontinuá ku tur trabou na bienestar di nos industria turístiko.