WILLEMSTAD- 29 di mart 2023 – Ofisina di Turismo di Kòrsou (CTB) i AFC Ajax a ekstendé nan kolaborashon te ku e temporada di 2023-2024. For di 2020 Kòrsou ta partner ofisial di Ajax i e logo di Kòrsou ta visibel riba e manga di e kamisa di unifòrm di Ajax durante tur partido ofisial di Eredivisie, KNVB Beker i kompetensianan di futbòl Europeo. Tambe Kòrsou ta keda visibel den i rondó di e stadion i den e kontenido riba e kanalnan di Ajax.

Menno Geelen, direktor komersial di Ajax a bisa: “Despues ku nos a bishitá Kòrsou ku henter e selekshon na final di e temporada anterior, a sali na kla un biaha mas kon fuerte nos kolaborashon a bira den e último añanan. Ademas e hungadónan i e staf por a eksperensiá pa nan mes kon bunita e isla ta i kon hospitalario e hendenan ta. Nos a mira e popularidat di Kòrsou oumentá i ta bon pa mira ku turismo na Kòrsou ta sigui krese. Nos ta kontentu di por kontribuí na e desaroyo akí durante e temporada benidero tambe.”

Muryad de Bruin, direktor di CTB, a duna di konosé: “Turismo ta un pilá ekonómiko importante pa Kòrsou. Nos ta risibí bishitante di Europa, Sur Amérika, Karibe i Norte Amérika. E alkanse grandi i internashonal di Ajax a yuda mehorá e visibilidat di Kòrsou den tur e merkadonan akí e último añanan, spesialmente debí ku nos logo ta riba e manga di e unifòrm di Ajax durante e kompetensianan Europeo. Nos ta sigui ku e kolaborashon akí ku masha plaser. Ademas nos ta ansioso pa risibí un otro delegashon mas di Ajax riba nos isla na yüni próksimo. E biaha akí ta Ajax Legends lo bishitá nos bunita isla pa un programa deportivo.”