WILLEMSTAD – 16 di yanüari 2014 – Tabata na kabamentu di aña ku Ofisina di Turismo di Kòrsou (CTB) a anunsiá ku Kòrsou a keda nominá den e kategoria ‘Best Caribbean Island’ di e kompetensia ‘10 Best Readers Choice Awards’ i a pidi pueblo pa vota pa Kòrsou. Pueblo di Kòrsou a respondé riba e yamada aki i asina a kontribuí pa posishoná Kòrsou na di dos lugá den e kompetensia, sigui pa St. Maarten na di 4 lugá i Boneiru na di 7 lugá. Na promé lugá a resultá, Puerto Rico. E kompetensia a keda promové dor di USA TODAY i a duna tur partisipante 4 siman pa vota pa e destinashon di nan eskoho. Sra. Libby McMillan, redaktor i e persona enkargá ku kontenido pa e sekshon di ‘10 Best’ na USA Today a komentá, “Tabata un reto hopi grandi pa un isla chikitu manera Kòrsou; un historia di David i Goliat.” Kòrsou tabatin 50% mas voto ku esun ku a posishoná su mes na puesto # 3 ku ta pone Kòrsou ku un bentaha grandi dilanti di esnan ku a keda posishoná entre puesto 3 i 10. Sra. McMillan ta finalisá bisando, “un felisitashon di kurason di parti di nos tur pa e pueblo di Kòrsou”. E kompetensia a keda promové tantu via publikashonnan digital i imprimí di USA TODAY, pues e promoshon pa nos isla un biaha mas tabata grandi. CTB ta gradisí i alabes motivá nos komunidat pa sigui partisipá aktivamente na tipo di kompetensianan manera esaki, ku por sigui posishoná Kòrsou komo e destinashon faborito den Karibe.