WILLEMSTAD- 11 di mart 2014:- Djamars mainta Ofisina di Turismo di Kòrsou (CTB) a tene un rueda di prensa pa hasi introdukshon di e evento kulinario ‘Culinair Curaçao’. Ta trata aki di un evento kulinario riba nivel internashonal ku partisipashon di tòp chèfnan for di Hulanda. ‘Culinair Curaçao’ a keda lansa  riba inisiativa di Does Travel & Cadushi Tours / Kuoni den estrecho koperashon ku CTB i KLM. E promé edishon di ‘Culinair Curaçao’ lo tuma lugá di 24 di mei pa 8 di yüni próksimo. Pa introdusí e evento a organisá un programa di familiarisashon kual a tuma lugá di 7 di mart pa 11 di mart último, ku partisipashon di 4 tòp chèf i prensa for di Hulanda. E 4 tòp chèfnan for di Hulanda tabata; Pascal Jalhay (Marfo, Amstel Hotel), Wilco Berends (De Nederlanden), Andre van Alten (La Provence) i Leon Mazairac (Podium onder de Dom). E delegashon di prensa hulandes tabata forma pa Telegraaf, Beaumonde, LXRY i Travelpro. E grabashonnan lo bai pa RTL Boulevard i Shownieuws. E delegashon a bishita Kòrsou pa asina sera konosí ku Kòrsou komo destinashon turístiko i tambe konosé e kushina di e diferente hotèlnan ku ta forma parti di e programa. Tambe nan a haña oportunidat pa eksperensia diferente aspekto kulinario outéntiko di nos isla. Avila Hotel tabata e hotèl anfitrion durante e programa. Den e promé aña ‘Culinair Curaçao’ lo konta ku 4 evento ku lo kubri kada biaha 2 siman di aktividat. Kòrsou lo risibí bishita di un grupo di chèf kòk di taya for di Hulanda ku lo bai kushiná huntu ku e mihó chèf kòknan di Kòrsou. Pa kada evento kulinario lo tin partisipashon di 3 pa 4 chèf kòk hulandes. E promé edishon ofisial di ‘Culinair Curaçao’ ta plania pa tuma lugá 24 di mei pa 8 di yüni próksimo. Hotèlnan ku lo ta anfitrion pa e promé edishon  lo ta: Avila Hotel, Santa Barbara Beach & Golf Resort Curaçao i Lions Dive & Beach Resort Curaçao. E idea ta pa ofresé un interkambio di kushina. Ademas di e hotèlnan partisipante lo invitá tambe otro hotèlnan i restorant pa forma parti di e evento dor di diseñá menúnan spesial ku lo por wòrdu merkadeá riba e plataforma di ‘Culinair Curaçao’. Durante di e trayekto di 2 siman lo organisá tambe ekskurshonnan kulinario den sentro di siudat Willemstad i diferente otro parti na Kòrsou. CTB ta risibí e proyekto aki ku brasa habri mirando e oportunidat ku e konsepto aki ta krea pa posishoná Kòrsou komo un destinashon ku por ofresé tambe un eksperensia kulinario na e biahero. ‘Culinair Curaçao’ lo atraé un segmentu nobo ku sigur lo bai duna resultado positivo. E meta finalmente ta pa por logra na desaroyá e konsepto aki pa e otro merkadonan tambe. Un danki ta bai tambe na e otro partnernan kual ta; Kura Hulanda, Fort Nassau, Hemingway, Chill, Blue Bay Golf & Beach Resort Curaçao, Dolphin Academy, Chobolobo – Curaçao Liqueur, Landhuis Dokterstuin i Landhuis Knip.