25.000 hende a bishitá e feria gastronómiko

Willemstad – 24 di sèptèmber 2016 – Resientemente, Kòrsou a partisipá na e ekshibishon kulinario Sabor Barranquilla. E aña aki 25.000 persona a bishitá e feria ku a tuma lugá na siudat di Barranquilla, Colombia. Durante di e último añanan e ekshibishon a bin ta krese poulatinamente te ku por konsider’é un di e grandinan na Colombia. Ku un área di ekshibishon di mas ku 2.085 meter kuadra, 1,800 persona trahando i dunando servisio i un kresementu den asistensia di mas ku 200% kompará ku aña 2015, Sabor Barranquilla a resultá un tremendo ekshibishon gastronómiko e aña aki. E feria a tuma lugá durante di 3 dia largu i na mes momentu tabata e fin di siman di apertura di un sentro di evento nobo na Barranquilla, esta Puerta de Oro. Kòrsou a forma parti di e mas di 115 ekspositornan di diferente otro destinashon ku tabata presente na e feria aki.

Nos propio Chef Broertje Marshall, resientemente premiá durante di kompetensia gastronómiko Amé Tauná na Bolivia i Chef Dane Ribeiro miembro di e tim kulinario di Kòrsou a representá Kòrsou i a ekshibí nos platonan lokal. Nan a presentá entre otro: ‘Salmón en agrio con pan tostado’, tutu ku piska i kesio. CTB i CHATA a keda kompaña pa InselAir pa asina huntu a promové Kòrsou komo destinashon faborito den Karibe. Durante di e evento InselAir a hasi uso di e oportunidat pa bende tíket pa Kòrsou. Di e forma aki CTB, CHATA i e diferente partnernan ta sigui hasi esfuerso pa posishoná Kòrsou den e merkado kulinario tambe. Anualmente Kòrsou ta risibí hopi bishitante ku ta disfrutá inmensamente di nos kushina ‘krioyo’, pues ta konsiderá un feria manera Sabor Barranquilla un plataforma ideal pa promové nos kushina lokal i Kòrsou komo destinashon kulinario.