WILLEMSTAD- 9 di ougùstùs 2021 – Ofisina di Turismo di Kòrsou (CTB) ta raportá un kantidat di 34.212 turista di estadia pa luna di yüli. Ku e kantidat di turista di estadia aki, luna di yüli 2021 a logra 92% di e kantidat registrá na yüli 2019 esta promé ku pandemia. Na yüli 2019 un total di 37.249 turista di estadia a keda risibí. E logro remarkabel aki tabata posibel dor ku Hulanda kual ta nos merkado ku ta produsí mas mihó a kibra rèkòrt den prestashon. Kòrsou a risibí 22.249 turista for di Hulanda na yüli 2021. Esaki ta promé biaha ku Kòrsou a risibí riba 20 mil turista di estadia for di Hulanda den un luna so.

Na yüli, un kantidat di 25.100 turista di estadia a bishitá Kòrsou for di Europa. For di Hulanda nos a risibí 22.249 turista, 1.032 for di Alemania i 776 for di Bèlgika. Di e turistanan europeonan, 53% a keda den un ‘resort hotel’ (esta hotèl grandi, chikí i bùngalo) na luna di yüli. For di Estádos Unídos un kantidat di 5.194 turista a bishitá Kòrsou na luna di yüli. Di e turistanan merikano, 71% a keda den un ‘resort hotel’. For di region di Sur Amérika un total di 1.532 turista di estadia a bishitá Kòrsou, 39% ta prosedente di Colombia miéntras 22% ta prosedente di Brazil. For di Karibe un total di 1.627 turista di estadia a keda risibí na yüli. Mayoria di e turistanan aki ta prosedente di e paisnan den Reino Hulandes.

Na luna di yüli un total di 6 barku krusero a bishitá nos pais ku un total di 7.630 turista krusero.

“Ku riba 34 mil turista di estadia kual ta ya kaba 92% di e kantidat registrá na yüli 2019 esta promé ku pandemia, por bisa ku rekuperashon den kantidat di turista a kue forsa. E desaroyo aki tabata posibel dor di e bon kolaborashon ku stakeholders lokal i tambe ku nos partnernan internashonal den e merkadonan prinsipal. Miéntras nos ta sigui traha huntu nos ta mira padilanti riba kontinuashon di e tendensia positivo aki”, asina CEO di CTB, Paul Pennicook a remarká.