WILLEMSTAD- 11 di yanüari 2022 – Ofisina di Turismo di Kòrsou (CTB) ta raportá un kantidat di 265.000 turista di estadia pa aña 2021. E promé 5 lunanan di aña e prestashon den kantidat di turista di estadia a kuminsá slo. Na luna di yüni 2021, CTB a kuminsá mira un kresementu den kantidat di turista di estadia espesialmente for di Hulanda kual ta e pais for di kua nos ta risibí mas tantu turista. Kòrsou a registrá un kantidat rèkòrt di turista for di Hulanda i esaki den kombinashon ku e kantidat di turista ku a bishitá nos for di otro regionnan importante a resultá den un di dos mitar di aña espektakular. Ku e kantidat di turista di estadia aki, aña 2021 a yega na 57% di e kantidat registrá na aña 2019 esta promé ku pandemia. Na 2019 Kòrsou a risibí un total di 463.683 turista di estadia. 

Desèmber 2021

Na luna di desèmber un kantidat di 42.281 turista di estadia a keda risibí. Ku e kantidat di turista di estadia aki, luna di desèmber 2021 a yega na 95% di e kantidat registrá na desèmber 2019. Luna di desèmber no tabata un eksepshon, Kòrsou a bolbe registrá un kantidat rèkòrt di turista for di Hulanda, un total di 24.062 turista hulandes a keda risibí na desèmber 2021. Pa di seis luna konsekutivo e kantidat di turista risibí for di Hulanda na 2021 a surpasá e kantidat di turista hulandes risibí den e mesun luna na 2019. Total un kantidat di 27.399 turista di estadia a bishitá Kòrsou for di Europa. Informashon kompilá for di e karchinan di imigrashon ta mustra ku turistanan europeo a keda un averahe di 12.5 anochi na luna di desèmber 2021. Miéntras na desèmber  2019 e averahe di anochi tabata 10. Di e turistanan europeo, 56% a keda den un ‘resort hotel’ (esta hotèl grandi, chikí i bùngalo) na luna di desèmber.

For di Nort Amérika un kantidat di 7.719 turista a bishitá Kòrsou. Esaki repartí den un total di  6.229 for di Estádos Unídos i 1.490 for di Canada. Di e turistanan aki for di Nort Amérika, 68% a keda den un ‘resort hotel’. E turistanan a keda un averahe di 8.2 anochi miéntras e mesun luna na 2019 turistanan prosedente di Nort Amérika a keda 7.4 anochi. For di region di Sur Amérika un total di 4.808 turista di estadia a bishitá Kòrsou. E turistanan aki a keda un averahe di 8.4 anochi miéntras e mesun luna na 2019 turistanan prosedente di Sur Amérika a keda 7.9 anochi. Di e turistanan for di Sur Amérika, 53% tabata prosedente di Colombia miéntras 19% tabata prosedente di Brazil. For di Karibe un total di 1.549 turista di estadia a keda risibí na desèmber. Mayoria di e turistanan aki ta prosedente di e paisnan di Karibe Hulandes.

Na luna di desèmber un total di 34 barku krusero a bishitá nos pais ku un total di 61.550 turista krusero.

E prestashon realisá den kantidat di turista di estadia ta sigui surpasá e lunanan anterior. Ku riba 40 mil turista di estadia na luna di desèmber 2021 nos por anunsiá ku orguyo ku e rekuperashon di nos industria di turismo ta riba bon kaminda ku otro luna ku bon presentashon konforme e temporada promé ku pandemia. Nos ta satisfecho ku e progreso realisá den e último lunanan di aña rekuperando di e manera aki for di e komienso slo na prinsipio di aña. E esfuerso kolektivo di stakeholders lokal huntu ku nos partnernan internashonal den nos merkadonan prinsipal a sòru pa e último 6 lunanan di aña tabata eksitoso. Si e tendensia aki kontinuá, nos ta pronostiká un mihó prestashon den kantidat di turista pa aña 2022.