WILLEMSTAD-  14 di novèmber 2013 – Resientemente Ofisina di Turismo di Kòrsou (CTB) a duna un presentashon durante ‘Workshop 2013’ na Valencia na unda a pone énfasis riba e oportunidatnan turístiko, empresarial, ekonómiko i den real-estate ku Kòrsou ta ofresé na turistanan i invershonistanan for di Venezuela. Personanan importante representando e área empresarial, operadónan di tour, agensianan di biahe i medionan di komunikashon tabata presente na Embassy Suites, Valencia. Durante di e enkuentro e representante di CTB na Venezuela, Sr. Marco Leal a ekspresá su mes bisando; “Pa Kòrsou e merkado di Venezuela ta masha importante pa e ekonomia di e isla. Hopi Venezolano a hasi invershonnan grandi den diferente area di negoshi. Un ehèmpel di esaki ta invershon den e aria inmóbil.  Desaroyonan grandi manera entre otro: Piscadera Harbour Village, Green View, Santa Barbara Plantation, The Palm Resort, Blue Bay, Zen City, Pietermaai, Jan Thiel ta duna e invershonista un idea di e alternativanan i ofertanan ku Kòrsou ta ofresé.” Otro áreanan di importansia ta e sektor finansiero,  komersio i negoshi.  Menshonando tur esakinan e invershonistanan Venezolano ta haña un idea di posibilidat i oferta ku nos isla ta ofresé. Sr. Leal a kontinuá bisando; “Un di e akontesimentunan ku lo tuma lugá den aprel 2014 ta apertura ofisial di Sentro Komersial Sambil kual lo kontené 8 sala di pelíkula, 144 lokalidat komersial i di servisio. E sentro komersial nobo aki sigur lo krea interes i motivá biaheronan pa bishita Kòrsou.” Ademas di esaki a duna presentashon di nos kadena hotelero ku ta brinda no solamente diversidat pero tambe e estilo natural di Kòrsou inkluyendo su beyesa i mahestuosidat. Algun di e hotèlnan mas sobresaliente ku a wòrdu menshoná den e presentashon tabata; Renaissance Curaçao Resort & Casino, Hilton Curaçao, Howard Johnson Curaçao Plaza Hotel & Casino, Santa Barbara Beach & Golf Resort Curaçao, Sunscape Curaçao Resort, Spa & Casino, Livingstone Jan Thiel Beach Resorti Curaçao Marriott Beach Resort & Emerald Casino. Kompania di aviashon Insel Air tambe a forma parti di e ‘Workshop 2013’na unda a partisipá oumento di buelonan riba e ruta entre Kòrsou i Valencia. Asina a hasi tambe menshon di eventonan, manera Curaçao North Sea Jazz Festival i otro atrakshonnan durante e presentashon den ‘Workshop 2013’ na Valencia, Venezuela. Un bes mas CTB a sá di probechá e okashon pa promové nos produkto den e gremio turístiko Venezolano. Ademas di esaki, tambe krea kuriosidat serka e invershonista Venezolano pa posibel proyektonan nobo.