Durante Wine & Food  Week na Texas:

WILLEMSTAD- 9 di yüni – 2013:- Siman pasa a tuma lugá e Wine & Food Week na Houston Texas, kaminda un bes mas Kòrsou a sá di bria ku su representantenan kulinario. Un di e hèrmèntnan promoshonal di Kòrsou ta nos kuminda; ken ku bishita Kòrsou ta keda enkantá ku nos kuminda ‘krioyo’. Den e oportunidat aki un biaha mas a ofresé bishitantenan di e Wine & Food Week un ‘tiki’ di Kòrsou den un tayó. Wine & Food Week ta un eksposishon kulinario, ku ta atraé mas ku 10.000 bishitante durante un siman largu,  den kual tin diferente evento presentá dor di ekspertonan kulinario internashonal, produktornan di biña i representantenan di diferente  restorant.

For di 3 di Yüni te ku 9 di Yüni tur ku a forma parti di e Wine & Food Week por a disfrutá di entre otro; lèsnan di konosementu di biña, demostrashonnan prepará pa vários shef, eventonan presentá pa outornan di buki di kushina i eksperensianan kulinario riba nivel. Ofisina di Turismo di Kòrsou (CTB) tambe a forma parti di e Wine & Food Week partisipando ku un booth den dos evento; djabièrnè 7 di yüni den e Sips, Suds & Sliders Event i djasabra 8 di yüni den e Wine Rendezvous Grand Tasting Event. Pa por a duna tur ku a bishitá e booth di Kòrsou durante e Wine & Food Week un sabor di loke nos isla tin pa ofresé a krea un “huki di eksperensia” kaminda e bishitante por a risibí informashon di Kòrsou miéntras e por a disfrutá di músika lokal presentá pa Ike Jesurun i haña un ñapa di nos sabornan kulinario prepará pa shèf Carlos Anthonij ku a prepará; “Pan ku Stobá” dia 7 di yüni i “Karni Stobá ku Funchi” dia 8 di yüni pa alrededor di 1200 bishitante. Durante e “2013  Shining Slider Competition”   Shèf Carlos Anthonij a impreshoná e huradonan ku su “Pan ku Stobá” logrando e di 2 puesto. Presentadora Natalie Bomke di e kanal di televishon Fox 26 Morning News na Houston tambe a tene un entrevista “Live” ku Shef Carlos i Gianina Atalita di CTB, i ámbos a hasi uso di e oportunidat pa promoshona Kòrsou na un públiko grandi na Merka. CTB ta gradisí tur ku a duna nan aporte pa Kòrsou por a forma parti di e Wine & Food Week; por mira atras riba un eksitoso evento na unda un biaha mas nos isla a sobresalí e biaha aki dunando tur hende un ñapa di e sabor outéntiko di Kòrsou.