Lavita: “Ku VITA Vegetarian Cuisine nos ke trese lokual vegetariano i vegan nan na Kòrsou pa vários aña kaba tin nesesidat na dje”.
Despues di tabata ofresé entrega te na kas via e servisio online “Dushi Food” pa algun luna kaba, e tan sperá restorant vegetariano ku opshonnan vegan a habri su portanan ofisialmente den e área kulinario di Pietermaai. E restorant ta e promé i úniko den su estilo. Riba e terasa parti patras di e restorant, klientenan por disfrutá di diferente snacks vegetariano i tambe vegan.
Tabata dos aña pasá ku Lavita a trese e idea dilanti serka su esposo sr. Ghislain pa habri un restorant spesialisá den kuminda vegetariano ku vegan. Un momentu ideal, komo ku mas i mas hende na Kòrsou tabata birando vegan i tabatin e nesesidat di un restorant ku por ofresé esaki. Despues di algun luna di averiguashon Lavita a start ku búskeda di un lokalidat pa laga su soño bira realidat. Vários opshon a wòrdu konsiderá, pero pa loke Lavita i Ghislain tabatin den mente, niun di e lugánan no tabata adekuá. Tabata kuater luna pasá na momentu ku un konosí a bisa Lavita di un lokalidat den e área di Pietermaai ku lo por ta algu ku e ta buskando. Despues di a hasi un bishita ku e mákelar, Lavita tabata sa mesora ku e lokalidat ku e adrès Kaya Wilson “Papa” Godett 76 lo bira e adres di VITA Vegetarian Cuisine. Su soño lo bira pronto un realidat.
Durante e Grand Opening di djasabra último, por a tuma nota di presensia di diferente personanan aktivo den e mundu kulinario ku a bin pa duna nan apoyo na Lavita i su restorant VITA Vegetarian Cuisine.
Aparte di un menu vegetariano ku diferente opshon di vegan, e menu di bibida stèrki i no stèrki tambe ta hopi amplio i asta a tene kuenta kaminda por, pa skohe bibidanan ku ta entre otro gluten free. Ku un tim di eksperto spesial di Licores Maduro a sinta i skohe entre otro biñanan ku ta organic i vodkanan ku ta gluten free. VITA Vegetarian Cuisine ta habrí di djaluna te ku djasabra di 6pm pa 10:45pm i entrante luna di òktober e restorant lo habri su portanan tambe pa almuerso for di 12pm.