WILLEMSTAD— Mas ku 3000 boluntario a bai man na obra durante e dos edishon di CURA DOET. En total tabatin 182 tarea òf aktividat i boluntarionan a partisipá masal den grupo di amigu, kolega òf skol i ku famia. E wikènt a inspirá hopi hende i a resultá den yen Kurason sumamente satisfecho. Grandi ta e gratitut di tur e organisashonan ku a haña un yudansa imenso. E promé tareanan a ranka sali djabièrne mainta fo’i 7 di mainta i gran parti di e trabou a kulminá djasabra atardi banda di 6 or di atardi. Na Radulphus College mas ku 250 hende a partisipá riba e dos dianan pa fèrf kasi 50 lokal di lès. Nos gobernador Lucille George-Wout tambe a dun’un man na Radulphus College. Hopi skol, entre otro Kolegio San Dominico, skol Julio Henriquez, Broeder Rigobertusschool, Kolegio San Martin de Porres, Kolegio Chaya Willems, Kolegio Nechi Pietersz, Kolegio Myrna Dovale a haña yudansa di alumnonan, mayornan i otro boluntario pa kambia kara di nan skol. Emmy Bertholdschool a drecha i organisá nan biblioteka i a haña bishita di Promé Minister Ivar Asjes. Kolegio Bellefaas Martis a traha un espektakular jardin di tire pa e muchanan hunga. Casa Cuna Villa Maria na Sta.Helena a transformá su tereno di hunga den un parke di trafikó uníko. Grandinan di Westpunt a bai dal un keiru na Bandariba kaminda nan a bishitá Zeilhaven di Asiento, Brakkeput Mei Mei i a konosé partinan di Banda Riba ku nunka nan no a mira. Kuido Integral Banda Bou tambe a pasa un ratu ameno na Sea Aquarium ku grandinan, un paseo ku nan a plania 5 aña pasá a bira realidat. E organisashon di CURA DOET, den man di Curaçao Cares i Oranjefonds ta sumamente kontentu ku tur e resultadonan i ku tantu boluntario i organisashonan por a haña chèns di traha huntu. “E resultadonan no ta solamente e transformashonan físiko ku tur hende por mira, pero tur e hendenan ku a sinti nan mes empoderá pa yuda i ku a sinti un sentido positivo di komunidat aki na Kòrsou”. Aki aya tin algun organisashon ku no a haña mes un tantu hende manera nan a spera, e materialnan no tabata bon prepará  òf tabatin algun miskomunikashon, pero e gran mayoria a kana masha bon mes. Nos kier yama pueblo di Kòrsou kompletu pabien ku e dos dianan positivo aki kaminda nos a hasi di Kurason i logra hopi huntu”. Pabien Kòrsou!