Tim Kulinario a destaká un biaha mas na Taste of the Caribbean Competitions…
E tim kulinario di Kòrsou a sòru pa representá Kòrsou eksitosamente na e e kompetensia Taste of the Caribbean na Miami. E kompetensia aki a wòrdu organisá pa e Caribbean Hotel & Tourism Association. E grupo hóben di chef i bartènder inmensamente motivá tabatin e oportunidat pa krea platonan distinto i laga vários invitado disfrutá di nan kreashon.
E kompetensia Taste of the Caribbean tabata konsistí di vários kompetensia individual di bartènder, chukulati, kuminda di laman, karni i pasteleria. Tambe tabatin un kompetensia di tim kaminda e tim kulinario a kushina pa 40 invitado. E evento ‘Caribbean 305’ a tuma lugá riba Djasabra, 23 di Yüni kaminda e tim a prepará vários pasa boka lokal pa e públiko. CTB a proveé un stènt impaktante i vários spònsor a opsekiá e tim algun pasa boka òf rekuerdo úniko pa e tim por repartí na e públiko presente. Tur esaki nan a atraé e atenshon kompletu di e públiko kual a hasi e tim su partisipashon na Caribbean 305 un éksito rotundo. Segun presidente i direktor di CHATA, Sr. Miles Mercera, kende tabata presente na e evento, “Kòrsou por ta hopi orguyoso di su tim kulinario. E hobenan aki a duna tur ku tin den e kompetensia i a sabi di hòrta kurason di hurado i e oudiensia na e kompetensia. E tim kulinario di Kòrsou a prueba ku Kòrsou ta un isla ku tin di tene kuenta kune ora ta trata di su hendenan i nan abilidatnan kulinario.”
Naturalmente e trabou duru di e tim no a keda sin haña mérito Jurnick Merced a gana un medaya di Oro den e kompetensia di Bartènder i tambe e la sali komo e Bartènder ku a traha e mihó cocktail den e kompetensia di Bartènder ku ingrediente sekreto. E tim Kulinario di Kòrsou a gana un medaya di Plata pa nan prestashon komo tim. Jereld Balentien a gana un medaya di Bròns den e kompetensia di Chef di Aña. Den e kompetensia di karni, Jévgeny Hasselmeijer a gana un medaya di Bròns. Den e kompetensia di Junior Chef, Brayan Arroyo a gana un medaya di Plata. Den e kompetensia di chukulati, Dane Ribeiro a gana un medaya di Plata. Den e kompetensia di pasteleria, Sjagnon Winklaar a gana un medaya di Bròns. I finalmente Jereld Balentien a gana un medaya di Bròns den e kompetensia di kuminda di laman. CHATA ta felisitá e tim Kulinario di Kòrsou 2018 ku nan logronan i ta yama nan danki pa a pone Kòrsou riba mapa internashonal.
E éksito di e tim no ta dependé solamente na e miembronan di e tim pero tambe na e sosten di kompanianan lokal. Spònsornan a hunga un ròl primordial pa e tim por logra obtene e medayanan. Un danki ta bai na e siguiente spònsornan: Landhuis Chobolobo, TUI, Caña Bar & Kitchen, Mosa Restaurant, Licores Maduro, Bacardi, Dolce Vita, Firgos, Deli Nova, Centrum Supermarket, Luke’s Cocktailbar, Curoil, DHL, Luxury Taxi Service, Café Barista, CINEX, Curacao Tourism Board, Windcreek, Curaçao Academy Hotel, Caribbean Bakery, Mangusa Supermarket, Fuik Microgreens, Caribbean Legacy, De Jongh’s Printing, Adorable Cakes, Cake Faces, Curaçao Delights, Bliss Sweets, Curaçao Creations, Leañez, Margil Party Rental, Dani’s Fruit Center, Amazia, Stacey Embroidery, Frog Media, Pluz Marketing, De Jongs Sporthuis, Hilton Curaçao, D&I Business Support, Experentia, TeleCuraçao,
Thelma & Louise, Me & Uniforms, Caribbean Cargo, All Stars, Coca Cola, La Vie en Rose i CHATA. E tim kulinario lo aterisá na Kòrsou riba Djadumingu, 1 di Yüli, 8.48 di anochi. CHATA ta enkurashá komunidat pa ban risibí e tim na aeropuerto pa felisitá i selebrá e tim su logro na e kompetensia. Si bo ta kla pa forma parti di e Tim Kulinario di Korsou i ke representá bo isla den eksterior i kompeti na Taste of the Caribbean 2019 tuma kontakto ku Selina Maduro Gumbs – selina@chata.org.