Lady Ella a drenta studio huntu ku Sablika.

Willemstad – Un soño ku a bira realidat den masha tiki tempu mes. Esei ta e manera ku Lady Ella ta deskribí su promé disko kompakto despues di a militá hopi aña den e arena di tambú. Esaki ta un regalo pa su fanatikonan ku e ta apresiá masha hopi mes i ku tur dia di nobo ta sostené den tur su presentashonnan. Tambe e ta un regalo pa e pueblo di Kòrsou kompletu kaminda asina aki Lady Ella ke duna su aporte pa sigui tene nos kultura bibu.

E disko kompakto lo ta riba merkado pa fin di siman aki. Un produkshon ku 7 tambú riba dje kaminda e kantadó ta duna Homenahe na: nos gran Bèno, baluarte di nos tambú i na Gordo Loefstop q.e.p.d., ko – fundadó di Grupo Rítmiko Sablika.

E kantadó ta kompartí e disko kompakto aki ku su yu muhé Tyeisha Bernabela ku un bunita tambú dediká na Mama i ademas den nan dos nan tin un komposishon.

Un cd pa komplasé kada smak. E cd titulá: “Lantami bèk”.