Willemstad, 13 mart 2016 – Djasabra último a tuma lugá e promé Kooyman Ultimate BBQ Cook-off kaminda 45 partisipante a kompetí pa e titulo di Kooyman Grill Master 2016. Despues di un kompetensia intenso Patricia Brunswyck a resultá e ganador di e titulo, Naf 1500 kèsh i un Weber Gas Genesis BBQ. E di dos lugá e bai pa Jason de Windt i su team ku a gana Naf 500 Kooyman giftcard i un Weber Gas Spirit BBQ. Tambe Eric Sussenbach a resultá den premio posishonando su mes na di tres lugá ganando Naf 250 Kooyman giftcard i un Weber Perform Premium 22′ BBQ.
E partisipantenan mester a grill loin ribs, mitar galiña i un burger den dos ora di tempu uzando un surtido grandi di ingrediente i sous. Kuater miembro di hurado; Vannesse Tweeboom, Jeroen van de Velde, Patrick van den Kolk i Carlos Anthonij, tabata tin e enkargo di purba e karninan sin sa ta di ken nan ta. Un di sinku hurado, Osfrien Offerman a huzga e partisipantenan abase di higiena.
Banda di e ganadornan di e kompetensia, tambe MC Monti a sa di prueba su mes i bai ku e titulo di Kooyman DJ Grill Master 2016. MC Monti ku orguyo a risibí su medaya i a gradisí tur ku a kere den dje i apoy’é durante e kompetensia. Tantu e partisipantenan i esnan ku a bishita e evento a disfrutá di e kompetensia, tremendo ambiente i e sukulento kuminda kual Landhuis Chobolobo Café a sòru pe.
Kooyman ta gradisí Weber, Deli-Nova, Hilton, Chobolobo Café, Firgos, e hurado i naturalmente e partisipantenan pa nan kontribushon, partisipashon i sosten. ‘Nos ta sumamente satisfecho ku e entusiasmo di e partisipantenan i e éksito di e evento. Nos no por a imaginá nos ku dos dia despues ku a habri inskripshon ya esaki lo a yena. Esaki ta prueba ku nos yu di Kòrsou ta stima un grillmentu di bèrdat. E partisipantenan tabata sumamente entusiasmá i esaki a kontribuí na un esfera hopi agradabel. E evento aki sin duda lo sigui krese’. Esaki segun Tanja Boon, Marketing Manager di Kooyman. Tur ku no a haña chèns pa partisipá e aña aki por kuminsá train for di awor pa Kooyman’s Ultimate BBQ Cook-off 2017.