Despues di un eksitoso akto di konmemorashon di 150 aña abolishon di sklabitut ku a tuma lugá prome di yüli ku a pasa, Plataforma Sklabitut i Herensia di Sklabitut ta kontinua ku su aktividatnan den lunanan benidero. Ta bon pa bisa ku prome di yüli a logra ku Museo Tula na Landhuis Kenepa a bira ofisialmente monumentu di Herensia material i inmaterial, dekretá pa gobièrnu di Kòrsou. Tambe a bini un plakat di gradisimentu na Tula komo nos heroe nashonal pa su lucha di libertat ku finalmente a kondusí na abolishon di sklabitut. E plakat aki a keda desvelá riba muraya di palasio di Gobernadó na Punda. Pa dekreto di gobièrnu tambe a keda disidí ku di awor en adelante, 1 di yüli lo ta “Dia di Emansipashon”, meskos ku otro paisnan ku tambe a konosé e epoka di sklabitut i su abolishon. Tur e aktividatnan aki a keda realisá bou di e lema: ”Di abolishon pa emansipashon”, indikando asina ku e abolishon di 1863 a marka un di e prome pasonan na kaminda pa emansipashon di pueblo di Kòrsou, despues di e gran rebelion di katibu di 1795 bou di liderasgo di nos heroe nashonal Tula. Pa e motibu aki ku orguyo i satisfakshon, Plataforma Sklabitut i Herensia di Sklabitut ta anunsiá su siguiente aktividatnan den kuadro di konmemorashon di 150 aña abolishon di sklabitut. Athunto tin e programa di aktividat di ougùstùs pa oktober benidero. Nos ta spera ku pueblo di Kòrsou lo sa di partisipá masalmente na e diferente aktividatnan aki komo apoyo i sosten na nos lucha  pa logra mas i mas emansipashon.