Willemstad – Minister di Desaroyo Ekonómiko, sr. Stanley Palm, ta informá ku entrante djaluna 7 di sèptèmber Ministerio di Desaroyo Ekonómiko (MEO) den estrecho koperashon ku Stichting Overheidsaccountantsbureau (SOAB) ta start ku e konteo di bùs chikí i mediano. E konteo aki ta dirigí riba e kantidat di karedanan di bùs, di pasaheronan i di e distansia di kilometer ku bùsnan ta kore. Meta di e konteo ta pa sigui mehorá e modelo di kalkulashon di tarifa di bùs chikí i mediano ku dato aktual. Durashon total di e konteo ta aproksimadamente 3 luna. E parti di investigashon na paradanan di bùs i den bùs lo dura aproksimadamente 1 luna.  Pa e konteo ta hasi uso primordialmente di studiantenan, ku lo ta rekonosibel pa tantu e shofùr di bùs komo e pasahero por medio di un badge. E konteo lo tuma lugá den tur trayekto i repartí na diferente parti di dia riba tur dia di siman i lo tuma lugá entre 7 or di mainta pa 7 or di anochi. Si tin kualke pregunta por manda un e-mail na:info.sectorondernemen@gobiernu.cw