WILLEMSTAD.- Djadumingu dia 30 di mart próksimo lo tin un tremendo konsierto di Jazz lokal ku presentashon di ‘Perfect Fourth’. Despues ku den luna di mart 2013 Roderick Volk, lider di ‘Perfect Fourth’ a lanta e kuarteto musikal huntu ku Marvin Snijders, Razhul Sebelon i Jovendrick Kierindongo, e kuarteto a kuminsá presentá na diferente sitio di entretenimentu rònt Kòrsou i por mira bek despues di 1 aña, riba un aña eksitoso. Pa selebrá nan promé aniversario lo tin un konsierto na Sentro Kultural Kòrsou, riba djadumingu, 30 di mart2014, di 6’or di atardi pa 8.30 di anochi. Porta ta habri pa 5.30 di atardi. Pa e konsierto aki Perfect Fourth lo tin komo artista invitá, e virtuoso riba piano, Randal Corsen i e kantante, Jouly Bridgewater. Karchi entrada ta kosta 30 florin i ta optenibel na Mensing’s Caminada, Albert Heijn, Van den Tweel Supermarket na Jan Thiel i serka e músikonan di ‘Perfect Fourth’. Fondonan rekoudá durante di e konsierto ta bai pa ‘Perfect Fourth’ realisá grabashon di nan promé disko kompakto. Reserva 30 di mart pa selebrá huntu ku ‘Perfect Fourth’.