Willemstad – Ketu bai tin hopi komentario positivo di e konsierto “Kalma E Tormenta” di Shamiro Anita, ku a tuma luga djasabra ultimo, den WTC. E sala tabata kompletamente yen, surpasando tur ekspektativa ku musica gospel ku shownan espektakular. Hopi ta esnan ku a presensia e evento aki ku ketu bai ta komenta kon nan a disfruta i sali hopi bendishona. Por bisa ku e meta di Shamiro a ser logra. Tabata un anochi den kual esnan presente por a gradisi Dios I eksperensia e Brasa di Dios ku por Move Tur Montaña i Kalma Tur Tormenta den nos tur su Bida.

E banda dirigi pa Xemio Jabobs i tambe su koristanan ku e gruponan Excelent Choir, Exel Arts Academy, A El Arte I Adonai a kompaña Shamiro riba e scenario ku shownan espektakular di Baile Stilt Walking, Sky Dancing, Laser Finger Show i hopi mas. Artistanan di Kòrsòu esta Liesella Thomas i di Aruba Eltienne Yarzagaray i Derwin Kemp i direktamente for di Hulanda Josh Matos a kanta huntu ku Shamiro un tremendo potpuri dje miho kantikanan gospel i tambe nan a kanta “ Stima Otro” loke a pone tur esnan presente kanta i alaba Dios en grande den un ambiente hopi dushi i bendishona.

Shamiro ta yama danki di kurason pa tur ku a kopera di un forma of otro i tambe na tur ku a bin e konsierto. Meskos e ta manda un gradisimentu i bendishon grandi na tur medionan di komunikashon ku a yud’e i tambe na su sponsornan ku a hasi e anochi aki posibel.

Riba e potretnan por mira kon espektakular e Konsierto & Show “Kalma E Tormenta” di Shamiro Anita tabata den un sala yen yen. Tabata un anochi inolvidabel yena ku pas, amor i bendishon.