WILLEMSTAD – E kuarteto Symbiosis di Randal Corsen lo figurá mas despues e luna aki riba e programa di e Rauw Festival bon kargá durante dos dia na Rotterdam.

Na 2011 Randal Corsen a forma e kuarteto Symbiosis ku tres talento grandi na Hulanda, esta Glenn Gaddum Jr., Mark Schilders i Vernon Chatlein, tambe di Kòrsou. Nan disku a kombiná e ritmonan di poder di Kòrsou ku e dinámika i eksplosividat di jazz. E zonidu progresivo, poderoso i inovativo ei a brinda Corsen un di-dos nominashon pa Edison. Awor, 10 aña despues i tambe despues ku e músikonan aki a desaroyá nan propio kareranan musikal, Corsen ta trese Symbiosis huntu atrobe pa un konsierto di reunion na e Festival Rauw na Rotterdam ku tin dianan 27 i 28 di òktober na Maassilo. Pero promé ku e fecha ei Symbiosis ta presentá tambe riba djabièrnè dia 22 di òktober na e klup di jazz Paradox na Tilburg. Durante su estadia Randa Corsen ta duna tambe un ‘masterclass’ na e konservatorionan di Tilburg i Rotterdam.
Anteriormente e luna aki Randal Corsen tabata na Hulanda kaba pa presensiá e estreno di e dokumental The Photograph di e sineasta Kurazoleño Sherman de Jesus i pa grabashonnan di e ópera ‘Katibu di Shon’ ku el a komponé pa Tania Kross, basá riba obra di Carel de Haseth.

Rauw Festival
‘Rauw’ (=kurú) ta para pa músika aventuroso ku ta buska e rantnan frañá di jazz. Mas kurú e ta, mihó. E festival, ku aña pasá tabata konosí ainda komo e ‘Festival Jazz International Rotterdam’, ta presentá artista ku ta karisiá no únikamente e oreanan, pero ku ta yama afó tambe, ku ta lansa pregunta i ku ta krea asombro. Aparte di Randal Corsen su Symbiosis, tin na e próksimo edishon tambe presentashon di Jo Goes Hunting Orchestra, The Pack Project di Alba Gil Aceytuno, Bandler Ching, Laura Perrudin, Han Bennink & Jelle Roozenburg, CLOD!, Coal Harbour, Heidi Bayer’s Virtual Leak i Amaguk (wak pa mas detaye: www.rauwfest.nl).