WILLEMSTAD — Manera ta ampliamente konosí i den tur e promoshonnan na radio i televishon , djasabra awor dia 20 di yüni lo tin e gran konsierto relashoná ku 10 aña formashon musikal den barionan aki na Kòrsou den sala Dr. Israel Leitoe, na Barbadosweg nr. 10.

E konsierto di djasabra awor lo bira sumamente interesante, kaminda lo bai tin presentashon di e hóbennan ku ta haña lès den barionan di Kòrsou i tambe di presentashon di e dos Junior Allstar Orchestranan.

E repertorio di Junior Allstar Orchestra ta konsisti prinmsipalmente di un CD sumamente varia, di kua ya un tema titula “Ban bek na nos rais” ta zonando na nos emisoranan lokal i na nos plantanan di televishon.

Komo chery riba e bolo, lo bai tin presentashon di Urvin “Luwi” Yano, popularisimo kantante di Kòrsou i Claudius Philips ku su tremendo hitnan direktamente for di Aruba.

Aparte ku e show aki tin un kontenido di hopi musikal varia i di nivel musikal haltu, e rekoudashon ta bai pa yuda duna algun hóben lès di músika grátis den bario, ya ku e sosten finansiero di e proyekto a keda redusí.

Instituto pa Formashon Musikal ta hopi agradesido na e kompanianan ku a duna nan sosten kumprando karchi, na e diferente skolnan i tambe un gradesimentu masha spesial ta bai na prensa ku a kubri e promoshon pa ku e evento aki.

Finalmente un danki na esnan ku ta sostené e proyekto aki ku tra MCB, Samenwerkende Fondsen, Reda Sosial i CORE NV.

E karchinan na rason di 35 florin pa adulto i 15 florin pa mucha ta optenibel na 24 uur uit de muur, Beep Beep Rio Canario, Inter Alfa i Curaçao Festival Center.

Ban sostené e proyekto di formashon musikal mas grandi na Kòrsou.