WILLEMSTad – Djamars dia 15 di yüli lo bai tin un presentashon di WESU jazz krioyo riba e barku Freewinds. E anochi ei lo bai tin ritmonan krioyo manera: tumba, seu, salsa antillana, ritmo kombina i salsa ku un bachi di jazz. Entrada di e konsierto aki lo bai pa e fundashon ‘Together’ ku tin meta pa juda hoben ku problema pa falta di atenshon di major nan despues di skol. E aktividat nan ku e fundashon ta ofrese e hoben nan despues di skol ta entre otro; kuminda i transporte pa kas, gia ku huiswerk, siña norma i balor i tambe rekreashon manera deporte i arte. Lo bai tin diferente musiko invita entre otro e drummer John Politakis i e kitarista Patrick Zagury di e orkesta di Freewinds. E sobra integrantenan di WESU jazz krioyo pa e dia ei ta riba trombon: Hector Sampson, Ron van Twuijver, Juni Bernadina, Giovanni Atalita, i Cedric Sillè. Perkushon: Aldrich Angel, Marchall Stefania, Chariton Thodè. Piano: Christoffer Wallè.  Bas; Ernesto Paz. Vokal:  Marilou St. Jago, Gerseline Pinedo i Gerald Torregrosa. Un invitashon ta bai pa un i tur presensia e anochi aki dia 15 di yüli 2014 riba Freewinds i disfrutá di jazz krioyo bibu. E aktividat ta kuminsá 8 or di anochi. No pèrdè e oportunidat aki. Entrada ta fl. 10, =. Pa karchi por jama 6985597.