Ku e popular kantante Elijah Oyelade di Afrika i hopi mas…

Dia 4 di yüni próksimo Elijah Oyelade di Nigeria, Michael Paniagua di Ecuador, Raigny di Ulanda huntu ku Ernest ‘Keke’ Williams i Berachah di Kòrsou, lo ta riba e mesun esenario den e konsierto benéfiko ‘I Celebrate You’, spesialmente pa rekoudá fondo pa New Song College.

Den luna di Febrüari New Song College  i tambe e kanal di televishon RTNS a bira víktima di ladronisia na unda malechornan a bai ku alrededor di 50 mil florin na material ku ta konsistí di entre otro mas di 20 laptop, desktop i kámaranan di RTNS.

Direktor di e skol sr. Derrel Bruno a indiká ku e suseso aki a manka e skol enormemente i no opstante di esfuerso hasi di nan banda, ainda nan no ta asina leu pa yega na e materialnan ku a pèrdè. Ta p’esei e ta sumamente agradesido ku tur e artistanan, personanan individual i medionan di komunikashon a duna nan sosten pa ku e evento ‘I Celebrate You’

Fundador i alabes Pastor, señor Welton ‘Papi’ Esprit a bisa ku no a start ku e skol djis pa bisa ku tin un skol. “E skol a nase paso nos kier a kuminsá implantá den e muchanan loke e komunidat ta sinti falta di dje ku ta mucha i hóbennan ku bon edukashon.

Ta opvio ku ta hóbennan sin edukashon paternal/maternal i eskolar a kometé e ladronisia aki, paso si nan tabatin maske ta un tiki edukashon  nan lo no a yega dje leu aki, paso nan lo a pensa ku e muchanan mester haña lès. Anto p’esei New Song College ta eksistí, pa huntu ku otro organisashon i komunidat den su totalidat yuda frena i trata di kibra  e sirkulo negativo aki ku ta kansa nos tur.”

E konsierto ta tuma lugá djasabra 4 di yüni  di 7:00 pa 10:00 di anochi na Sentro pa Desaroyo Integral Dr. Israel Leito den Barbadosweg, Buena Vista. Elijah Oyelade ku ta e presentashon prinsipal, ta kosechando hopi éksito ku su kantikanan di gospel manera Aleluya, Father Me i Emmanuel.

E ta un adoradó, maestro i kompositor konosí pa su kontenido lírikal profundo di su kansionnan. Su músika i estilo ta impaktá i inspirá hopi persona rònt mundu, inkluyendo Kòrsou.

Pa aportá ku e konsierto benéfiko aki kumpra bo karchi na balor di Ang. 25,- pa adulto i 10,- pa mucha te ku 14 aña, optenibel na LataLata, Mr&Ms Exclusive, Mensings Caminada, Kingdom Experience of na New Song Office (888-0562/ 522-5111).