WILLEMSTAD – Anke situá na e mesun sitio ku e Marriott bieu, Curaçao Marriott Beach Resort nobo lo haña un radiashon kompletamente diferente. Esei ta loke Gerente General Craig Martin durante un enkuentro ku prensa awe tardi a titulá komo ‘fresh & casual Caribbean’, na e isla Kòrsou ku segun e ta bai tin un futuro briyante den turismo. P’esei tabata asina atraktivo p’e pa pronto por start sali ku un tim kasi kompletamente lokal.

Despues ku den oranan di mainta minister Zita Jesus-Leito di VVRP ku un delegashon a bin tira un bista na e hotèl ku ta na punto di habri i ku tabata impreshoná na final di su bishita, asina e medionan lokal presente tambe por a haña un bon impreshon di loke pronto lo brinda e wéspetnan i hende lokal igualmente. Señor Martin a presentá e tim di gerensia. Por ehèmpel, Director of Catering & Convention Services Anjali Bakmeijer a konta ku orguyo ku e diferente ballrooms ta kasi kompletamente reservá pa e lunanan binidero. HR Manager Tirza Garmes-Daal a konta ku e 189 empleadonan nobo ta ansioso pa por kuminsá. Nan ta haña entrenamentu riba tur tereno pa nan ta kla prepará pa e trabou real. E kantidat aki di empleado ta pa kuminsá, pasobra manera e nesesidatnan presentá lo amplia e grupo aki.

F&B Manager Mark Sjollema a splika ku loke ta resaltá ku nan ke ta ‘diferente’. Na total tin 9 F&B outlet – die restorant Ç-spice i Salty Iguana na pisina te na Market Place pa tuma algu rápido i e room service 24/7, kada un ku un konsepto propio kaminda e karakterístika Karibense lo bini dilanti. E hotèl lo hasi esfuerso pa yama bon biní na e wéspetnan di afó, pero tambe na e klientenan lokal. Por ehèmpel, e konosido Marriott brunch lo bini bèk.

Suite mas luhoso

GM Craig Martin a splika ku e renovashon drástiko a rekerí un invershon di mas ku 75 mion dòler Merikano. Esei ta enserá tambe ku riba e 3 pisonan eksistente a konstruí un piso mas. E hotèl awor tin 336 kamer ku un interior moderno ku wifi, televishon ku pantaya grandi, su mes frizjidèr, un skina pa traha kòfi òf te i un baño amplio. E hotèl tin tambe 8 suite mas luhoso ku por konektá tambe ku kambernan na banda pa akomodá famianan. Hotel Manager Jaime Osma a laga e miembronan di prensa atmirá algun kamber nobo.

For di fin di otro siman e promé wéspetnan di hotèl lo yega. For di meimei di novèmber e hotèl lo ta den operashon ku un soft opening. Despues lo por anunsiá un apertura mas festivo. Remarkabel ta e hanchura di e área di lòbi, resepshon, terasa pa sinta i parti di bar ku lo hasi un tremendo promé impreshon, spesialmente riba wéspetnan di eksterior, tirando un bista riba mar Karibense tras di e pisina grandi. E siman aki a kita e tranké ku a sirbi pa protekshon durante e trabounan di konstrukshon i ta limpiando e playa ku no usa durante 3 aña.