Willemstad- 22 di aprel 2015 – Konseho pa Mantenshon di Derecho (Raad voor de Rechtshandhaving) a keda instituí pa medio di un dekreto di Reino. E Konseho ta un órgano di inspekshon independiente i ta inspekshoná funshonamentu den e kadena hudisial den e paisnan Kòrsou, Sint Maarten i Bonaire, St. Eustatius i Saba. E Konseho ta tira bista riba e funshonamentu di e organisashonnan den e kadena hudisial, e koperashon entre e organisashonnan den e paisnan i e koperashon entre paisnan. E inspekshon ta relashoná ku e siguiente instanshanan:

• Polis i instituto pa formashon di polis i Ministerio Públiko;
• Instituto i instanshanan ku ta duna kontenido na kastigunan ku ta limitá òf kita libertat, òf reklasering òf unda ta duna kuido na víktima;
• Otro organisashonnan ku pa medio di un dekreto gubernamental òf pa lei ku ta kai bou di e Minister indiká den e lei di Reino òf ku ta forma parti di e kadena hudisial.

Konseho pa Mantenshon di Derecho ta hasi inspekshon relatá na efektividat, kalidat di ehekushon di e tarea i maneho. E Konseho ta apoderá pa lei i ta hasi su trabou independiente di e instansha i e Minister responsabel. E Ministernan lo por, despues di konsulta ku e Konseho, duna instrukshon pa loke ta realisashon di e plan anual di e Konseho. Konseho pa Mantenshon di Derecho ta realisá su trabounan abase di un protokòl ku ta duna bista den e prosedura i reglanan di koutela ku e Konseho mester atené su mes na dje ora e ta realisá su trabounan. Konseho pa Mantenshon di Derecho, konforme artíkulo 33 di e Lei di Reino, ta emití 1 di mei un relato riba estado di mantenshon di derecho den e paisnan.

Un bista riba e trabounan realisá desde ku a instituí e konseho

E periodo despues di 10 di òktober 2010 a konsentrá su mes rondo di lantamentu di Konseho pa Mantenshon di Derecho i e sekretariado di e Konseho. E promé inspekshonnan a tuma lugá na òktober 2011. E Konseho di 2012 pa 2013 a haña mas i mas bista den e funshonamentu di e diferente organisashonnan hudisial. Den e periodo aki e Konseho a hasi un asina yama “doorlichting” di algun organisashon i a realisá tambe algun inspekshon temátiko. Tin algun di e inspekshonnan aki ku a konsentrá nan mes tambe riba e koperashon entre partnernan den e kadena.

Tantu e kambionan di struktura estatal, kaminda e funshonamentu di e kadena hudisial a haña responsabilidatnan outónomo den e pais, komo e kambionan den lei i regla, a surgi efekto riba e instanshanan konserní.

Bista di konsehonan duna den 2014

Konseho pa Mantenshon di Derecho den 2014 a hasi 8 inspekshon na Kòrsou. E konseho a duna e siguiente konsehonan:

• Prosedura pa hasi denunsia: Konseho pa Mantenshon di Derecho a konkluí ku no a sigui mayoria di e konsehonan den rapòrt di inspekshon di e Konseho na 2012. P’esei a bolbe hasi e rekomendashonnan sperando ku lo tin mehoransa riba tèrmino korto;
• Maneho di ophetonan ku keda tuma den beslag: E Konseho a konkluí den e rapòrt aki ku e manera ku algun instansha na Kòrsou ta atendé ku ophetonan, ku keda tuma den beslag, no ta di akuerdo ku e proseduranan stipulá pa lei. E Konseho den realisashon di su trabou a hasi e maneho di ophetonan ku keda tuma den beslag mas transparente;
• Aplikashon di aktuashon ku forsa dor di polis: Konseho pa Mantenshon di Derecho a hañ’é importante pa, enbista ku aplikashon di aktuashon ku forsa dor di polis tin su impakto riba tantu e polis, e suidadano(nan) i henter e kuerpo, hasi un inspekshon ku si tin sufisiente garantia pa evitá i atendé ku aktuashon ku forsa brutu innesesario.

E rapòrt aki a keda entrega na Minister i lo keda publiká pronto.

• Ehekushon di sentenshanan penal: Meta di e investigashon aki ta pa haña un bista den e forma ku sentenshanan penal ta keda ehekutá. Konseho pa Mantenshon di Derecho a konstatá ku e supervishon dor di Ministerio Públiko riba ehekushon di e sentensha dor di SDDK, por keda mehorá i a duna konseho den e kuadro aki.
• Protekshon di mandatarionan: Meta di e investigashon aki ta pa hasi e forma ku mandatarionan ta keda protehá mas transparente i inventarisá te kon leu e protekshon di mandatarionan ta kumpli ku na normanan aplikabel. E rapòrt aki a keda entrega na Minister i lo keda publiká pronto.
• Justitiële Jeugd Inrichting Curaçao (JJIC): Meta di e inspekshon aki tabata pa haña un bista mas kla den e organisashon di JJIC i e forma ku e ta ehekutá su tarea pa por kumpli ku su metanan. Durante di e inspekshon a bin konstatá ku e empleadonan di JJIC ta keda difikultá den realisashon di nan tarea dor di falta struktural di formashon (adishonal) i oportunidat di estudio.   Konseho pa Mantenshon di derecho ta konkluí ku, no opstante e opstákulonan aki, JJIC, komo instansha apuntá pa lei, ta duna kontenido na su enkargo pa ehersé akshonnan penal di OTS, PIJ i detenshon di hóben pa hóbennan menor di edat.
• Infrastruktura pa prevení korupshon: Meta di e inspekshon aki ta pa haña un bista den e manera ku Kòrsou ta kapas pe kombatí korupshon. E rapòrt aki a keda entrega na Minister i lo keda publiká pronto.

Konseho pa Mantenshon di Derecho riba petishon di Minister a inisiá un inspekshon na Voogdijraad. E investigashon aki lo keda finalisá pronto.

Aktividatnan plania pa 2015

Konseho pa Mantenshon di Derecho tin un agènda yen ku inspekshon pa keda realisá den 2015.

E siguiente inspekshonnan lo keda realisá na Kòrsou, Sint Maarten i islanan BES:

• E forma ku ta atendé ku kombatimentu di atrakonan: E inspekshon aki ta konsentrá rondo di e pregunta ku e entidatnan ku tin di atendé ku atrakonan ta ekipá pa na un forma efektivo i efisiente kombatí atrakonan;
• Prevenshon di kriminalidat bou di hóbennan: Ta hopi importante pa nos komunidat na un manera efektivo tuma akshon pa prevení ku hóbennan ta kai den komportashon kriminal i despues ta bin den kontakto ku hustisia i jeugdreclassering;
• Atendementu ku personanan ku problemanan sikiátriko adikshon den kadena penal: Esaki ta un investigashon ku ta toka Brasami na Kòrsou. E Konseho ta hañ’é importante pa, mira for di bista di esnan ku a kai den man di hustisia, nan reintegrashon den komunidat, protekshon di komunidat i seguridat, investigá kon ta para ku atendementu di personanan ku problema sikiátriko den e kadena penal;
• Interkambio di informashon polisial i hudisial den Reino: E Konseho lo hasi un investigashon ta kon leu i den ki forma ta interkambiá informashon tokante hustisia den Reino.

 

Banda di esaki Konseho pa Mantenshon di Derecho lo realisá e siguiente investigashonnan spesífiko:

• Seguridat den prison: Abase di investigashonnan realisá dor di e Konseho na 2012 i 2013, tokante detenshon na Kòrsou, e Konseho ta haña ku tin sufisiente informashon pa hasi un investigashon tokante seguridat den nos instituto penitenshario;
• Sèlnan di polis: Konseho pa Mantenshon di Derecho ta haña ku tin sufisiente base pa realisá un investigashon tokante di e sèlnan di polis pa asina bin ku rekomendashonnan pa mehorá e situashon.
• (Kontinuashon di) Investigashon tokante e maneho di Sepot: Den e investigashon aki lo investigá te kon leu ta kumpli ku e kriterionan ku ta base di e maneho di persiguishon i Sepot.

Riba islanan BES banda di e investigashonnan ku ta tuma lugá den tur tres teritorio lo realisá e siguiente investigashon spesífiko:

• E efekto di uso di dos idioma den mantenshon di derecho: Konseho pa Mantenshon di Derecho lo hasi un investigashon tokante di e efektonan ku uso di dos idioma (Ulandes i Papiamentu) tin riba mantenshon di derecho.