Nos di Konseho di Supervishon, e órgano statutario ku bosnan a skohe komo boso wowo pa yuda wak boso interes den ACU, ta aserka boso ku e supliká pa asistí na e reunion general di ACU. Diadumingu 16 di Juni ta selebra “Dia di Tata” pero aun asina nos di konseho di Supervishon ta pidi tur sosio pa asisti na e reunion general di ACU ku ta kuminsa 9or di mainta na WTC. Durante di e reunion boso komo sosio lo tende i mira kon a bai ku boso koperativa den e aña ku a pasa 2018 i boso komo sosio lo vota e futuro rumbo ku boso ke pa boso koperativa bai.

Diferente aña Konseho di Supervishon ta konstatá ku ta un grupito chikitu di menos ku 300 sosio tei den reunion general ora di vota desihonan importante ku tin gran impakto riba futuro di ACU. ACU tin mas ku 28.000 sosio. Bini na e reunion pa abo vota kiko ta pasa ku futuro di bo sennan den ACU, futuro di bo fiansanan.

Konseho di Supervishon ta preokupa ku futuro di ACU i ta p’esei nos a tuma e inisiativa e aña aki pa via di nos medio nan di komunikashon, pa hasi un yamada na nos sosio nan di ACU pa akudí masalmente dia 16 di yüni próksimo 9or di mainta na WTC pa sostené Konseho di Supervishon i yuda nos ku tomo di desishon nan na bienestar di nos kada unu ku ta sosio i na bienestar di kontinuidat di e koperativa ku nos tur ta stima i ke mira floresé.

Nos ta konta ku bo presensia djadumingu dia 16 di yüni próksimo.

Un kordial saludo,

Konseho di Supervishon di ACU

na nòmber di esaki,

Elsirha Isenia-Scope

Presidente