E aña aki a bin cu un rifa cu hopi premionan atractivo pa yuda recauda fondo pa Koningin Wilhelmina Fonds Aruba. A aserca varios comerciante cu a yuda pa haci e lista di premionan posible. E premionan ta:

• Un auto KIA Rio Hatchback
• Crusero den Caribe pa 2 persona Cortesia di Maduro Travel
• 2 tickets pa Amsterdam-Aruba-Amsterdam pa 2 persona pa Cortesia di KLM
• Gift certificate 1000 florin cortesia di Caribbean Mercantile Bank Aruba
• Gift certificate 1000 florin cortesia di Boolchands
• Gift certificate 1000 florin cortesia di SETAR
• Gift certificate 1000 florin cortesia di Unicon
• Gift certificate 1000 florin cortesia di SUPER FOOD
• 1 pasashi pa Medellin, Colombia pa cortesía di Insel Air
• 1 pasashi pa Puerto Rico pa cortesía di Insel Air

Prijs pa rifa ta 25 florin pa un ticket y 500 florin pa buki. E rifa lo tuma lugar dia 01 di november proximo. Desde awe, e bukinan lo ta pasando rond caba y e comision organizador ta haci un apelacion riba un y tur pa duna un man y contribui pa e bon causa aki.

Cancer ta un enfermedad cu awendia ta ataca hende jong of di edad, muchanan, muher y homber den tur famia y sin descriminacion. E ta un realidad cruel no solamente pa e pashent, pero tambe pa su famia y otro hendenan stima. Mundialmente e cantidad di hende cu cancer ta aumenta y na Aruba tambe nos conoce hopi caso di cancer.

Durante tur e añanan di existencia Koningin Wilhelmina Fonds Aruba a experiencia e aumento den gastonan extra cu e enfermedad y tratamento di esaki. E gastonan di cuido di un pashent di cancer ta hopi halto y ora yega asina leu pa e pashent, e fundacion ta cubri esaki completo. E gasto di mas grandi ta e cuido di pashent na cas. Un cuido na cas ta costa bastante pero si e pashent di cancer acerca e fundacion aki pa motibo di no por cubri esakinan, e ta haya e ayudo gratis.

Ademas di articulonan manera cama, prothese etc, ta percura pa guia pa e famia, un guia pa e pashent mes y e cuido na cas completamente gratis. Tambe KWF Aruba ta cubri transporte di cas pa Oncologie, di Oncologie pa cas bek y pa dokter bai bin. Ademas di cubri gastonan pa e pashentnan cu mester di esaki, KWF Aruba ta traha den campañanan di conscientisacion manera a anuncia recientemente, unda ta enfoca riba come saludable, move mas, peso saludabel, no huma, haci checkup regular etc.

E comision organizador di e rifa pa recauda fondo pa KWF Aruba ta gradici un y tur comerciante cu a haci e rifa posible y awor ta haci un apelacion pa pueblo henter contribui pa e bon causa. Pa unicamente 25 florin, bo ta contribui pa yuda Koningin Wilhelmina Fonds Aruba yuda comunidad y alabes bo tin e chens di gana premionan sumamente atractivo. Pa mas informacion riba e servicionan di KWF Aruba por bishita e website www.koninginwilhelminafonds.com