Sambil ta kuminsá desaroyo inovativo

WILLEMSTAD – Konforme promesa i planifikashon, inougurashon di e promé fase di e sentro nobo di kompra Sambil Curaçao na Veeris ta den porta. Djaweps dia 28 di mei 10 or mainta e portanan di Sambil ta habri pa promé biaha pa e públiko grandi. Su siguiente dia lo kòrta e sinta komo señal ku for di e momento ei Sambil ta kuminsá ku un fase inovativo di desaroyo, tambe pa Kòrsou. Sambil Curaçao no solamente ta pretendé di ta mas ku un sentro di kompra, pero e ta demostrá esei tambe for di e promé dia. Anke ku no a plania festividat pa kompañá e apertura di dia 28 di mei, tòg tin mesora na sierto ora un variedat di aktividat den e kompleho pa deleitá e públiko, di tur edat, ku ta bin hasi kompra: ku músika, baile, demonstrashonnan, etc. Ta trahando ainda riba e detayenan aki. E orario ku Sambil lo ta habrí ta di 10 di mainta te 9 or di anochi di djaluna te i ku djasabra i riba djadumingu i dianan di fiesta di 12 or di mèrdia pa 7 or di anochi.

Ta kalkulá ku dia 28 di mei awor sigur 40 hürdó lo ta kla pa risibí nan promé klientenan, tantu den e pakusnan komo e establesimentunan den food court. Den e dianan, simannan i lunanan binidero lo agregá kada be mas marka i nòmber (pa un resúmen wak www.sambil.cw), loke ta kuadra ku e vishon di famia Cohen pa desaroyá Sambil Curaçao, meskos ku na e nuebe sentronan di kompra na Venezuela i Repúblika Dominikana, pa e bira un sentro integral di aktividatnan komersial, públiko, deportivo i kultural. Pa Kòrsou e ta un konsepto nobo ku gradualmente lo materialisá pa despues ekspandé i adaptá esei kada be mas. E ta kuadra tambe den e filosofia di Sambil pa huntu ku un kantidat di sosio traha riba e Kòrsou di futuro.

Interes kresiente

Niun kaminda na mundu un sentro di kompra a habri ku for di e promé dia tur espasio disponibel tabata kompletamente okupá i den uso. Ni despues ku a wanta dos luna mas no ta tur hürdó pa rasonnan diferente a logra tin tur kos na òrdu i na tempu pa dia 28 di mei, pero nan tambe dentro di poko lo habri nan negoshinan. Loke si ta remarkabel ta ku awor ku e apertura ta den tapara, durante último simannan bastante komersiante lokal i di afó a mustra interes serio pa nan tambe habri un unidat den Sambil Curaçao. Nan a sinta wak promé kiko ta sosodé. Awor ku nan ta mira ku ta algu serio i ku Sambil ta un sentro di kompra moderno i kompletamente aire kondishoná ku no tin niun pa igual’é na Kòrsou i ku mesora ta kontá entre esnan mas grandi den área di Karibe, nan tambe ke establesé den dje. Nan tambe ta rekonosé ku pa e públiko ku ta hasi kompra e ta un sitio plasentero. Miéntras ku e mayornan hasiendo nan kompranan, e yunan por disfrutá den e espasionan ku ta dirigí spesialmente riba nan. Ademas por skohe for di un kantidat grandi di lugá pa tuma algu di bebe òf kome. Tin espasio agradabel pa meimei di e aktividatnan tuma tempu pa relahá un poko. Ademas e kompleho kompleto ta brinda wifi grátis.