Willemstad – Kámara di Komèrsio i Industria di Kòrsou ta organisá pa empresarionan ku tin interes den eksportá for di Kòrsou riba djaweps 19 di mart for di 1.30 te ku 5.00 PM un Konferensha Empresarial yamá “Expanding Your Market through Exports” na Avila Hotel, La Belle Alliance, Penstraat 130. Mirando e potensial di kresementu afó mas empresarionan lokal ta dirigí nan mes riba merkado internashonal. Tin hopi ehèmpel di empresanan lokal ku ta eksportá nan servisio i produkto. Kámara di Komèrsio lo kompartí e oportunidatnan aki ku otro empresarionan. Toine Knipping, CEO i kofundador di Amicorp, outor dje buki ‘Mind Your Business: Thoughts for Entrepreneurs” huntu ku su tim a sa di ekspandé e kompania na un empresa multinashonal ku ofisinanan rònt mundu. Toine Knipping lo kompartí e stapnan esensial pa ta eksitoso riba merkadonan nobo. Partisipantenan lo risibí informashon riba e sosten ku Kámara di Komèrsio por ofresé na empresarionan ku ke eksportá, tambe empresarionan lo por partisipá den un esfuerso konhunto pa amplia e benta pa merkado eksterior. E último parti dje atardi ta duna oportunidat na empresarionan pa amplia nan red. Kámara di Komèrsio i Industria di Kòrsou