Willemstad – JCI Dutch Caribbean ta organisá pa di 7 biaha ofisialmente e ‘Leadership & Development Academy’. Na e edishon aki a parti e evento den dos seshon. E promé lo tuma lugá 13 i 15 di mei i e di dos seshon lo tuma lugá den ougùstùs di e aña aki. E motibu di esaki ta pa duna chèns na e partisipantenan di praktiká loke nan lo siña promé nan bai e siguiente nivel di konosementu.

Kon pa liderá ku kontenido den siglo 21 ta e tema sentral e aña aki. Tin dos dia plania ku diferente oradónan lokal i internashonal. Djaweps 13 di mei ta habrí pa públiko en general. Nos oradónan riba e dia aki ta: Sueena Francisco, Dupal Persaud i Gino Jacobs. Abo hóben ku ke sa kon pa bo ta un lider ku kontenido i ke sa kon pa desaroyá bo mes tanten bo ta duna bek na nos komunidat, e evento aki sigur ta ideal pa bo.

Djasabra 15 di mei e enfoke ta pa kapasitá nos miembro lokal i internashonal di JCI. Nos oradónan riba e dia aki ta: Argenis Angulo, Alejandra Castillo, Rainelda Maduro, Candice Henriquez i Silvetty de la Paz. Riba e dia aki lo bai tin diferente workshop, panel di diskushon, teambuilding i lo klousura ku un seshon di networking.

JCI ta un organisashon global di lider nan entre 18 pa 40 aña, ku ta transformá hóbennan den lidernan kapas pa medio di eventonan, training, proyektonan i programanan. JCI Dutch Caribbean ta konsistí di 5 kapítulo lokal. Na Kòrsou JCI Creative Leaders in Curaçao (CLIC), JCI Involvement Of Banda Ariba Curaçao (IOBA Curaçao) i JCI Willemstad. Na Aruba: JCI Young Active Leaders Aruba (YALA). Na Sint Maarten: JCI SXM A.C.T.I.O.N (Aspiring Change To Impact Our Nation.

E ‘Leadership & Development Academy’ di e aña aki lo ta kompletamente digital i e ta kosta $15 pa por partisipá. E preis aki ta duna públiko general akseso na e seshonan di djaweps i miembronan akseso na e seshon di djaweps i djasabra.

Pa mas informashon i inskripshon por subi nos wèpsait: https://www.jcidc-lda.com.