WILLEMSTAD – Den un sala yen yen na WTC e buki Mimina, Katibu Pa Kuantu Tempu Mas, a keda presentá na e públiko presente. Tur hende tabata sumamente entusiasmá pa tende i lesa di e buki aki. Algun persona ku a lesa e buki aki kaba a duna testimonio kon nan a hari i yora ku e kontenido di e buki. Sra. Kraal a splika ku Mimina, Katibu pa Kuantu Tempu mas ta un novela históriko, ku ta konta bida di 5 generashon di hende muhé katibu na Kòrsou den añanan 1700-1863.  E último di nan ta Mimina. A kosta e eskritora 8 luna di estudio di historia di Kòrsou i Caribe pa por a skibi e buki aki. Tokante di e buki; Mimina su amistat ku su doño Miriam a para kaba na nada di un dia pa otro ora e siña komprondé ku e ta solamente un katibu. E ta propiedat di Miriam. E por wòrdu bend’é, usá, i mal usá na kualke momentu. Un rabia a drenta Mimina i el a buska revancha aunke su mama i wela a rog’é pa e tene fe den Dios i no laga su kurason bira amargá. Mimina no ke tende. E ke ta hende liber pa kaba! E no ta bai warda riba Dios ni niun hende mas! E ta kla pa trapa riba tur hende pa e logra su meta. Mimina lo baha su kabes atrobe i aseptá ku e ta propiedat di hende? Òf e lo por logra su libertat pa su famia manera e ta deseá? Pastor Calvin Varlack di Iglesia Grasia Abundante a dediká e buki aki den presensia a di e Madrina Ginita Thomas ku alaves a edita e buki na Papiamentu. Dos organisashon a risibí buki grátis ku ta Fundashon Amigunan di Kristu na Fuik i tambe Yùfrou NadinTorres ku ta kuminsá traha den derde klas na Kustbatterij. Tabata tin un bunita baile di Etlien Janga i por último Jo-Hanna Kraal (9 aña) a sera ku un tremendo kansion; “I have had my mind made up.” Un Pabien grandi pa famia Kraal kompletu, nan mayornan i tur famia i amigunan presente.

E buki aki ta e di 5 publikashon di Luisette Kraal.

E eskritora Drs. Luisette Kraal- Thielman ta un Enfermera i un Teólogo ku ta skibi i publiká na Papiamentu i Ingles. Huntu ku su kasá, Ed Kraal i nan yu muhé Jo-Hanna nan ta biba na Chicago Illinois, Merka. Nan tin e ministerio Salbá Pa Sirbi ku tin komo meta pa kompartí e amor di Dios.

Otro publikashonnan di Luisette Kraal : Na Papiamentu: Hanna i Su Kabai, Riba Kaya. Na Ingles: Mimina, the Slave Girl, Sophia’s Marriage. E bukinan aki ta optenibel na Boekhandel Mensing. Por lesa mas di Luisette Kraal riba su website  www.Luisettekraal.com