Willemstad – Fundashon Sentro pa Inovashon i Guia Edukashonal (SIGE), e aña aki pa 19 aña konsekutivo huntu ku nos spònser prinsipal, Bo Banko Amigu, Maduro & Curiel’s Bank, a organisá e kompetensia di Lesa pa otro skucha entre nos skolnan di fundeshi i spesial na Kòrsou.
Den e kompetensia aki kampionnan di e diferente skolnan di fundeshi i spesial a kompetí ku otro den ‘Lesa pa otro skucha’, lesando na papiamentu i hulandes. Ku e aktividat aki SIGE huntu ku LITO i MCB a bin ta promové lesamentu di buki bou di nos muchanan, netamente komo un medio pa komuniká i komprondé teksto, konosé su kultura, su alrededor i nos mundu. ‘Lesa pa otro skucha’ komo un forma diferente di lesamentu ta aktividat dibertido pa grandi i chikí ku ademas ta stimulá desaroyo di idioma, konsentrashon, kreatividat i abilidat sosial serka e mucha.
Djasabra último, dia 8 di aprel e 10 finalistanan ku ta representá e siguiente skolnan Glorieux College, FO Elis Juliana-Sheila Karel, St. Joris College, Kolegio San Dominico, St. Franciscus College, Kolegio Chaya Willems, Fatima College i Kolegio Sta. Clara a kompetí ku otro den e sala di Stichting New Song den e kompetensia final, kaminda tabatin un tremendo ambiente i tur presente a gosa un bòl.
SIGE ta hopi orguyoso ku ‘Bo Banko Amigu’, Maduro & Curiel’s Bank, a integrá e kompetensia di Lesa pa otro skucha den su proyekto di ‘Kuida bo skol i stima bo skol’. Den kuadro di e proyekto ‘Lesa pa bo skol’ e skolnan di e ganadónan ta gana premio kèsh pa nan skol ku despues e skol por invertí den entre otro proyektonan di lesamentu. E skol di e kampionnan ta risibí kada un NAf. 2.000,-, e di dos premio ta NAf.1.250,- i e di tres premio ta NAf. 750,-. E skol ku a animá su partisipante mas mihó a risibí NAf. 500,-. Aparte ku tur e amiguitunan di LITO ku a representá nan skol den e rondonan preliminar a risibí un bunita regalo di Lito, e finalista i ganadónan tambe a risibí premionan individual serka LITO.
E resultado di e final di e kompetensia ta lo siguiente: E premio pa e mihó “Yell” a bai pa St. Franciscus College
Ganadornan di “Lesa pa Otro Skucha 2017” na Hulandes:
Ganadó apsoluto a resultá Jewel Capriles di Kolegio Chaya Willems
E promé finalista ta Sharenis Manuela di FO Elis Juliana-Sheila Karel
E di dos finalista ta Ezra Anthony di St. Joris College
Ganadornan di “Lesa pa Otro Skucha 2017” na Papiamentu:
Ganadó apsoluto a resultá Sharmelys Rosaria di Fatima College
E promé finalista ta Sheneylis Marceli di Kolegio San Dominico
E di dos finalista ta Tanisha Lovert di Kolegio Chaya Willems
Nos di Sentro pa Inovashon i Guia Edukashonal ta yama un danki na Maduro & Curiel’s Bank i LITO pero tambe na e siguiente spònsernan ku a kere den e kompetensia aki i a kontribuí ku diferente regalo pa e 10 finalistanan: House of Style, Dolphin Academy, Boekhandel Boekplus, Boekhandel Mensings Caminada, Boekhandel Bruna, Otro Kara Tambe, PWC, Digicel, Banko Sentral di Kòrsou i Sint Maarten, Curiol, Funmiles, ACU, CHB, SBAB, CORE, Kooyman, Curinde i Advocatenkantoor van Eps Kunneman van Doorne.