Willemstad – Minister di Desaroyo Ekonómiko, Sr. Stanley Palm, a partisipá na e di 21 konferensia anual di Florida Caribbean Cruise Association (FCCA), ku a tuma lugá na St. Maarten siman pasá. Durante e “CEO/Presidents & Ministers Meeting” algun punto hopi interesante a bini dilanti. Un di e puntonan aki ta ku e kompanianan krusero a komprometé ku lo bai empleá trahadornan lokal (di islanan ku nan ta bishitá) riba e barkunan krusero. Esaki ta algu ku Minister Palm a bini ta bringa p’e for di añan pasá huntu ku mandatarionan di otro pasinan di region. Kòrsou sigur lo ta un di e paisnan ku lo keda konsiderá komo un di e promé ku lo aserká ku e plan aki, mirando ku mayoria di nos hendenan por papia tantu ingles komo spañó. Durante e konferensia, Minister Palm huntu ku e “project team” i CPA a presentá e plan i diseño di e di dos Mega Pier na e “Operations Committee” di FCCA, ku a keda impreshoná ku esaki. Tambe a sigui ku e kòmbersashonnan ku algun di e kompania krusero ku a mustra interes pa ta parti di e proyekto aki. Si tur kos kana segun plan, Kòrsou lo tin su di dos Mega Pier pa fin di aña 2016.