Diasabra ultimo durante un cena special, den e elegante ballroom di Hyatt Aruba Regency Resort & Casino, e miembronan di Kiwanis Club of Aruba, a bini hunto pa instala e directiva nobo pa e aña Kiwanistico 2018-2019.
Despues cu sra. Norma Brinkenberg Spellen a habri oficialmente e anochi, a sigui e himno di Aruba. A continua cu e invocacion, lesa pa Nathalie van der Linde. E obhetivonan di Kiwanis International, a wordo presenta pa “Distinguished President” Edbert Schwengle pa despues sigui cu un brindis special pa tur partners, cu ta sostene nan pareha den nan labor pa comunidad como miembro di Kiwanis Club of Aruba of otro instancia. E parti aki tabata presenta pa “Governor Elect” Robert Spellen.
Pa instala e directiva nobo, mester a tuma despedida prome di e directiva anterior y e prome discurso di e anochi tabata presenta pa presidente saliente sra. Norma Brinkenberg Spellen. El a elabora riba e aña cu e la fungi como presidente y tur e proyecto-, donacion- y e logronan cu a realisa pa e comunidad di Aruba. Tabata tin un presentacion di video cu tur e proyectonan realisa durante e aña Kiwanistico 2017-2018. Alabes a gradici e directiva saliente y e club completo pa nan dedicacion y e bon trabou cu nan a realisa. E instalacion di e directiva a ser realisa door di Lieutenant Governor pa Division 26 di Kiwanis International sr. André Kelly kende a pin e directiva nobo, cual tin como tarea pa guia nan club den e aña Kiwanistico 2018-2019.
E directornan pa Kiwanis Club of Aruba; John Every, Ryan Kock, Aurora Dijkhoff, Indra Anthony Pereira, Jo- Anne Arends, Nathalie Maduro y Ingmar Ramharakh, secretario: George Croes, tesorero: Claudine Ho Kang You, president saliente Norma Brinkenberg Spellen, segundo vice-presidente: Fernando Rigaud, prome vice-presidente: Linda Lou Huiskes y como presidente Edalitza Weller. Mester remarca cu Edalitza ta e presidente femenino mas hoben y alabes e prome “SLP” femenino pa bira presidente di e club. “Service Leadership Program” ta e programanan partocina pa Kiwanis Club of Aruba na e scolnan caminda ta siña e hobennan for di tempran liderazgo, con pa traha den ekipo, organisa proyecto- y eventonan pa recauda fondo, y e importancia pa duna bek y contribui cu e comunidad. Edalitza Weller a forma parti di Kiwanis Key Club Colegio Arubano y durante su discurso el a elabora riba su experiencia como SLP y ki impacto esaki tabatin den su bida.
E club a presenta un reconocimento na Sra. Norma Brinkenberg Spellen pa su excelente trabou y pa finalisa e anochi a duna oportunidad pa e invitadonan trece nan palabranan di bon deseo pa e directiva nobo pa e aña Kiwanistico 2018- 2019. Kiwanis Club of Aruba a duna un reconocimento tambe na sr Giantonio Muller pa su trabou realisa como Lieutenant Governor di Division 26 pa e aña Kiwanistico 2017- 2018. Legion of Honors a keda otorga na e miembronan cu tin 25 aña sirbiendo e comunidad di Aruba: sr John Every, sr Gordhan Kimatrai, sr Ray Farro, sr Carlos Albertus, sr Leslie Tweeboom, sr Robert Nieuw y sr Robert Spellen.
Entre e invitadonan special tabata tin e placer di a comparti e ocasion importante aki cu e presidentenan di e clubnan di servicio na Aruba; Kiwanis Club of PalmBeach, Kiwanis Club of Young Professionals, Rotary Club of Aruba, Women’s Club of Aruba y Rotaract Club of Aruba.
E presidentenan di tur SLP’s clubs di Kiwanis tabata presente manera; Kiwanis Key Club Colegio Arubano, Kiwanis Key Club of San Nicolas, Kiwanis Key Club International School of Aruba, Kiwanis Circle K of EPI, Kiwanis Circle K of University of Aruba, Kiwanis Builder Club Mon Plaisir y Kiwanis Aktion Club Sonrisa.
Kiwanis ta un organisacion global di boluntario dedica na mehora mundo via un mucha y via di un comunidad cada biaha y tin como lema: sirbiendo e muchanan di mundo. Pa mas informacion di Kiwanis Club of Aruba por bishita nan pagina web www.kiwanisclubofaruba.org.