ORANJESTAD: Recientemente Kiwanis Club of Aruba a tene su conferencia, unda a anuncia na comunidad di Aruba nan famoso y anticipa evento anual, pa recauda fondo “Wine Gala”. E aña aki e tema ta “Dubai” y e evento lo tuma lugar riba diasabra 29 di september cuminsando pa 8’or y mey di anochi na e luhoso Renaissance Convention Center. E decoracion den e tema di “Dubai” lo ta uno espectacular unda e colornan briyante y vibrante lo enfoke principal cu efectonan di luz, briyo, luho y hopi glamour. For di yegada e invitadonan lo keda impresiona y impacta cu un espacio netamente transforma p’e elementonan decorativo, cu ta laga bo sinti den un ambiente completamente diferente.
Tur e fondonan cu recauda durante e evento aki, ta destina pa cubri e diferente proyectonan cu Kiwanis Club of Aruba ta ehecuta na beneficio di comunidad durante henter aña. Como ehempel por menciona algun proyecto cu ta patrocina, manera; e clubnan hubenil Key Club Colegio Arubano & Key Club San Nicolas, Aktion Club Sonrisa, Builders Club y Circle K EPI n’e scolnan, pero tambe Back-to-School Project, Pasco den Bario, Smile Makers pa cuido dental pa mucha, Bon Bista p’e cuido visual pa mucha, Panda Book contra abuso sexual di e menornan, Kamishibai pa stimula contamento di storia pa mucha, Recyclaje di bais, Outstanding Student Awards na scol secundario, proyecto di Hisamento di Flie, Campaña di conscientisacion den trafico Don’t Text & Drive, y hopi hopi mas.
Carchi ta na benta p’e suma di Afl. 400 pa dos persona cerca tur miembro di Kiwanis Club di Aruba of via 567-8567. Por reserva carchi via Kiwanis Club of Aruba su Face Book page of via e website www.kiwanisclubofaruba.org. Cumprando carchi pa “Dubai ” Wine Gala, ademas di contribui pa un bon causa, bo lo bay goza di un anochi spectacular yena cu sorpresa, unda lo tin wine stations, variacion di keshi y un buffet exkisito di e arte culinario Arabe.
Adicionalmente pa complace tur gusto, lo tin un cash bar pa otro bebida. E combinacion musical tan spera cu ta priminti di pone tremendo ambiente riba e anochi aki t’e banda di aña di Carnaval ‘N Fuzion, e banda revolucion di Aruba, Buleria, e impresonante Blue Boulevard Band y DJ Edson Tromp.
E dress code ta gala y e tema ta crea e oportunidad pa bisti cu e tokenan elegante, pa acentua e anochi di ‘Dubai’. Lo tin varios ‘door prize’ atractivo unda e main door prize lo ta un travel voucher di biahe balora na AWG 2500 caminda e ganador por scoge e destinancion di su soño. Un danki inmenso ta bay n’e wine suppliers cu e aña aki atrobe –mescos cu tur aña – ta coopera cu Kiwanis Club of Aruba cu nan biñanan di renombre cu ta Arion Wine Company, Divino, Hodgson Trading, Playa Liquor, Pepia Est, Romar Trading y Tropical Bottling Company. Kiwanis ta un organisacion global di boluntarionan dedica na mehora mundo via di un mucha y via di un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1964. Pa mas informacion di Kiwanis Club of Aruba y of su actividadnan por acudi na www.kiwanisclubofaruba.org of e pagina di Facebook.