Despues di eksitoso ‘Prince of Courts’ wikènt pasá

WILLEMSTAD: Tim di básketbòl Willemstad Warriors, sostené pa nan patrosinadó Banco di Caribe ta organisá ‘Prince & King of Courts’. Pa algun aña kaba Banco di Caribe ta patrosiná Willemstad Warriors i ta mashá orguyoso di e manera kon nan ta profilá ariba i pafó di kancha. Djadumingu último a tuma lugá e promé etapa, esaki tabata e ‘Prince of Courts’ na unda ku hóbennan di entre 14 i 19 aña di edat- tantu prinsipiante i eksperensiá por a partisipá. E evento a resultá den un gran éksito, tantu na kantidat di partisipante i tambe na públiko fanátiko di básketbòl ku a akudí na Stadion Niels Liberia pa apoyá e timnan.

Banco di Caribe pa 10 aña kaba ta sostené ekipo di basketbòl BdC Willemstad Warriors i ta hasi esaki pa stimulá desaroyo positivo di e deporte di básketbòl na Kòrsou. Un di e metanan pa organisá ‘Prince & King of Courts’ ta pa mantené e deporte bibu. Un kompetensia amistoso ta nèt bon pa e hóbennan, e ta tene nan skèrpi i ta krea lasonan amistoso i deportivo. Pa esnan un poko mas grandi, e kompetensia ta yen di adrenalina i e bataya ta fuerte. E ganadónan di ‘Prince of Courts’ djadumingu último a resultá den kategoria U14, Spartacus A, den kategoria U16, DripFam i den kategoria U19, Royal Hoops. Na di dos lugá den U14 a resultá Sharks, den U16 Spartacus i den U19 Hounds. Terser lugá den U14 a bai pa Spartacus B i den U19, Willemstad Warriors. Pabien na tur ekipo ku nan partisipashon!

Banco di Caribe ta invitá fanátikonan di básketbòl pa djadumingu awó dia 16 di sèptèmber, ora ku e kabayeronan di 19 aña bai ariba batayá pa e titulo di ‘King of Courts’. E kompetensia ta kuminsá 11’or di mainta na Stadion Niels Liberia. Lo entregá premio 6’or di atardi.