“Kultura di Kòrsou semper por a konta ku nos….”

Yanüari, 2016 – WILLEMSTAD: Ya ta pa algun aña kaba ku Asosashon di Músiko Kòrsou (AMAK) por konta ku e patrosinio di e restorantnan KFC, Subway i Pizza Hut. E siman aki lo bira ‘kayente’ konsiderando ku tur bista ta fihá riba e anochinan preliminar di Festival di Tumba pa mira ken ta klasifiká pa djabièrnè awó. “Komo branding partner di Festival di Tumba nos ta satisfecho ku e trabou ku henter direktiva di AMAK a bin ta hasi pa no únikamente promové e festival pero, engrandesé tambe. Den esaki ta tuma nota di esfuersonan pa motivá kantantenan pa partisipá i tambe krea kantantenan prospekto nobo pa e festival. Ademas di esei ta suprayá e promoshon den region pa sigui garantisá un asistensia grandi pa e festival”, esaki di akuerdo Sr. Randy Maurera.

KFC, Subway i Pizza Hut lo tin diferente spesial pa henter e temporada di karnaval, tambe klientenan por spera ku tur tres restorant lo wòrdu bon representá den Curaçao Festival Center (CFC) repartiendo diferente artíkulo promoshonal riba e anochi final, djabièrnè awó dia 22 di yanüari. “Nos sosten no ta únikamente ku Festival di Tumba, pero ku kultura di Kòrsou. E kresementu di Festival di Tumba ta bai pareu ku e desaroyo kreativo di nos komunidat. Pa por sigui desaroyá Festival di Tumba komo un produkto musikal mester pone mannan huntu. Aporte i kontribushon di patrosinadónan ta hasi un diferensia grandi i ta duna e organisashon espasio pa sigui traha, nos ta konsiente di esei. Esaki mes ta un di e motibunan pa kual un biaha mas nos ta aportá na Festival di Tumba.”, asina Randy Maurera a finalisá bisando.

KFC, Subway i Pizza Hut ta deseá tur músiko, kompositor i areglista hopi éksito e siman aki i ta invitá pueblo di Kòrsou pa selebrá nos kultura i disfrutá di e anochinan preliminar di Festival di Tumba i pa finalmente djabièrnè nos tin un Rei/Reina di Tumba nobo ku lo kompañá e marchanan di karnaval.