Pabien na GLOBAL BMX Curaçao ku nan pista nobo:

Willemstad- Òktober 2013; “Nos ta masha kontentu di por pone nos skouder bou di un proyekto asina positivo pa nos hóbennan lokal. GLOBAL BMX Curaçao a bin ta demostrá perseveransha pa alkansá nan metanan, awe nos por mira’tras riba un trayekto eksitoso na unda ku hóbennan ku ta práktika e deporte di BMX tin nan propio pista di entrenamentu”, esaki di akuerdo ku Randy Maurera den representashon di KFC. Tabata despues di seremonia di inougurashon di e pista di BMX nobo na Chuchubiweg #10, banda di e edifisio di CSC ku a tene e promé kareda di BMX riba e pista nobo. E kompetensia a konta ku partisipashon di mas ku 200 partisipante for di diferente parti di mundu. Ademas di partisipashon di mayoria atleta BMX lokal a konta tambe ku presensia di kampionnan mundial di BMX manera; Raymon van der Biezen, Sarah Walker, i Corbin Sharrah.  KFC ta kontentu di por a aportá na e klínika tambe ; GLOBAL BMX Curaçao a tene un klínika spesial pa tur e atletanan di BMX na unda profeshonalnan den e deporte a brinda entrenamentu i guia profeshonal na nos atletanan lokal. E klínika aki a tuma lugar for di 7 te ku 11 di Òktober último. “BMX biking  ta birando mas i mas popular riba nos isla. KFC semper ta duna su kontribushon na inisiativanan deportivo ku ta stimulá tantu práktika di deporte komo motivashon pa un estilo di bida salu pa grandi i chikitu. KFC ta sumamente orguyoso di por duna su aporte na un organisashon asina dinámiko manera GLOBAL BMX Curaçao. Masha Pabien”, asina Sr. Maurera di KFC a tèrminá.