Willemstad – Djasabra benidero, 24 di ougustus 2019 entre 16:00 or i 00:00 or lo tuma luga e di tres edishon di e festival den kaya ‘Kaya Kaya’ na Ser’i Otrobanda. Habitantenan di bario, artistanan, boluntarionan, artesanonan i e inisiadonan Kurt Schoop, Raygen Zuiverloon i Clayton Lasten, resumiendo, e team di Kaya Kaya a uni forsa pa é meta: leave it better behind. Djasabra ta e día pa selebra lokual nos a logra. Tur hende ta bon biní na e festival kultural den kaya Kaya Kaya pa atmira i selebrá huntu e desaroyonan fisiko, kultural i soshal den e bario.
Delaster luna henter e bario a drenta den movishon. Grandi i chiki, hòmber i muhé, yu di Kòrsou i imigrante: tur hende a partisipa. E inisio di e desaroyonan tabata un limpiesa grandi den e bario. A limpia kayanan, rekohé shushi i kosnan bieuw i fèrf i drechá e kasnan.
Además a agrega varios arte den e bario. Schoop ta konta orguyoso: ‘ENNIA komo spònser mayó, huntu ku e.o. Bernard Cultuur Fonds i otro spònsernan a sòru pa un eksploshon di arte, manera e pintura grandi riba muraya di Sander van Beusekom, instalashonnan di Giovanni Abath i Ailsa Anastatia i dos skultura remarkabel di Carlos Blaaker. Spònser importante MCB a inisia un konkurso di diseño yamá ‘Bisti un bril positivo’. E diseño di Irsaidy Recordino a ser elegí i elaborá den un pintura di muraya fantastiko. I esei no ta tur kos!’
E edishon aki ta trese bishitantenan bek den e kayanan den bisendario di Ferdinandstraat. E área di e festival ta más grandi ku nunka anterior. Apesar di esei a sòru di krea un esfera intimo ya komo ku e festival ta repartí den diferente kaya más chikitu. ‘Ictual a yuda traha un app ku ta indika unda kua aktividat ta tuma luga i na ki orario. E elemento di sorpresa ta keda importante. P’esei nos no por dibulga tur kos ahinda’, Lasten ta konta.
‘Kiko si nos por dibulga?’ Zuiverloon ta bria ora e ta elaborá tokante e line-up musikal: ‘Danki na e.o. Fundashon Bon Intenshon i Curaçao Tourist Board Kaya Kaya por ofresé un variedad grandi di sorpresanan cultural, artistiko, musikal i experensianan di disciplinanan amplio! Realmente nos por papia di diferente festival den unu: un festival musikal, artistiko i artesanal i kulinario!
Lo bai tin varios aktuashon musikal manera Issoco, Crosstown Traffic, Vibe Nation ft. Junior Tecla, Jasmin & Zoinx, Kondjemba, Maestro Band, maestronan di skol di músika CCC ku e.o. Enrico Henriquez, Arjen de Graaf, Steve Mariat, Rònchi Matthew, Highway band, Hype i hopi otro más. Talentonan hoben lo tin un luga importante den e edishon aki tambe, manera na Teatro Luna Blou of riba e podio grandi, por ehèmpel Andrew Christopher & Casimno. Mas ku 12 DJ lo laga e bishitantenan swing den tur e kayanan di bario i naturalmente den Latin Bodega.’
‘Sòru pa bo tin sufisiente hamber i set’ Lasten ta agregá. ‘Mi ta atrebi di sigurabo ku bo ke purba kuminda di e 25 diferente bendedonan den e establisimentunan temporal, truck di kuminda i naturalmente e kuminda di e habitantenan di bario. Lo bai tin entre otro Backyard Kitchen by Baked-ish, Fish Market By Lienchi, Burgers by Brgr.haus, Sòpi di Altagracia, Pitsmoker, Damas BBQ, Janice Daal Fish Truck, Creaties di Chef Michelangelo de Bies, Sushi by Chopstix i diferente kosnan di boka dushi.
‘E festival mes no ta e meta. E festival ta e manera pa trese hende huntu i duna e bario un impulso positivo. Esaki nos ta hasi den koperashon estrecho ku Fundashon Ser’i Otrobanda’ Schoop ta konta. ‘Kaya Kaya ta wòrdu di spònser dor di diferente kompania pa desaroya e bario di un manero sostenible. Entre otro MNO Vervat, MijnMaatschappij, Kooyman, AVF i Fundashon Kas Popular ku a duna un aporte enorme na e limpiesa di e bario, of wak por ehèmpel e aporte di Licores Maduro den e periodo pa e festival i na e festival mes. Danki na tur e spònsernan aki i na tur e boluntarionan i habitantenan di bario ku nos por a realisa esaki. Nos ta sumamente gradesido!’
Kaya Kaya tin un mishon: ‘Leave it better behind’. ‘Asina nos ke bai di Kaya pa Kaya i demostrá e potenshal di Otrobanda i sentro di suidat i sigi desaroyá’ según Zuiverloon. Ku e festival e inisiadonan ke stimulá e bario. ‘Nos ke demostra e potenshal di e bario, nos kultura i sosiedat. Resumiendo, nos orguyo! Sorpresa i enkuentro ta sentral. Músika, kuminda, arte i un bario fantástiko ta krea e sorpresa i enkuentro aki. E uniko kos ku a keda nos pa bisa ta: ban topa otro den kaya na Kaya Kaya!’
E evenemento ta gratis i ta pa grandi i chiki. ‘Ultimo tepnan: bin trempán pa bo no pèrde nada; bin huntu paso luga di parkeer ta limitá i bin ku sapatu komfortabel ku por resistí algu. Paso komo bishitante bo ta bai move sigur. Den e diferente kayanan di e festival. I naturalmente riba pista di baile!’ Lasten ta konkluí hariendo.
f: www.facebook.com/Kayakayaparty/