Samenwerkende Hulporganisaties Curaçao tin un number di whatsapp 5291919 kaminda por registrá pa pakete di komestibel di Voedselbank. A amplia e sistema di registrashon ku un callcenter i databank di adrès pa por atendé e kantidat grandi di petishon. Tur dia tin hende ta pèrdè trabou i ta haña nan ta pidi  pakete di komestibel. Remarkabel ta ku hopi petishon ta drenta via bisiña i konosí di e personanan den nesesidat.

For di 10 di aprel,  fecha ku a kuminsá ku e registrashon via whatsapp, boluntarionan ta haña un avalancha di reakshon i ta trahando for di kas di dia i anochi pa por prosesá tur informashon mas rápido posibel. “Nunka mi no por a pensa ku tin tantu hende pareu asina den nesesidat. Ora nos a kuminsa nos a haña 3000 mensahe di whatsapp den 2 dia”,  asina un kordinadó di petishon ta deklará. “Hendenan den situashonnan ku ta kibra bo kurason, pero ku na mes momentu ta duna bo ánimo pa traha mas duru ainda pa por yuda mas lihé posibel”.

Te ku siman pasá Samenwerkende Hulporganisaties Curaçao tabata risibí un promedio di 350 whatsapp pa dia di kual por a kaba prosesá 250 pa dia. Tin ora e sistema tabata pega i hendenan tabata desesperá.

Pero esei a pasa pa pasado. Entrante 28 di aprel Samenwerkende Hulporganisaties Curaçao ta disponé di un callcenter di Odd-Networks. Tur petishon ku drenta via e number di whatsapp 5291919 ta haña un ‘link’ pa por drenta den kontakto ku e callcenter. Esaki a amplia e kapasidat enormemente i ta pone ku por prosesá tur petishon mas lihé. Ta urgi tur hende ku hasi un petishon pa keda den e mesun chèt i no manda un chèt nobo kada biaha pa no brua e sistema ku konsekuensha ku kada biaha tin ku bolbe kuminsá henter e proseso di nobo. Pa introdukshon di e callcenter a entrená 29 boluntario. Por alkansá e callcenter 7 dia pa siman di 9 or di mainta te 9 or di anochi. Awor e proseso ta kana muchu mas fasil i registrashon ta tuma solamente 3 minüt.

Ora di registrashon ta pidi datonan importante manera nòmber, adrès, bario, number di telefon, number di sédula, kantidat di persona mayor i menor di edat na e adrès. Tin un database ku ta kontrolá si ya kaba a hasi petishon òf a registrá kaba via otro organisashon, òf si un otro hende ya kaba a registrá e mesun kaso.

Kaminda ta nesesario ta saka registrashon dòbel. Esei ta posibel komo Ictual Connected Solutions a logra digitalisá adrèsnan di tur hende ku a registrá pa pakete di komestibel serka un di e organisashonnan afiliá. E sistema digital aki ta garantisá privasidat di kada kaso. Adrès di tur petishon ku drenta via whatsapp 5291919 tambe ta bai den e sistema digital aki. Via di e sistema digital ta kordiná e distribushon di pakete pa por yuda tur hende mas lihé posibel.

Voedselbank ta bolbe kontrolá i evaluá e adrèsnan. Despues e organisashonnan afiliá ta bin buska nan paketenan pa nan distribuí bou di nan hendenan. Petishonnan individual ta keda repartí pa boluntario di FKP i Ban Huntu, un grupo di eks-marinir i Scouting Antiano.

Aktualmente Voedselbank ta produsí 2500 pakete pa siman. For di 10 di aprel te aworaki ya kaba Voedselbank a parti 7850 pakete. E meta ta pa kada petishon pa pakete di komestibel keda honrá den menos ku 1 siman. E kontenido di e pakete ta basá riba un famia di 2 adulto i 2 yu. Tin sierto adrès ta risibí mas ku 1 pakete komo tin mas hende ta biba na mesun adrès. Tur boluntario ta di opinion ku e trabou ta duru i ta afektá nan emoshonalmente, pero ta hopi satisfaktorio.