Di Djabièrnè 6  pa djadumingu 8 di òktober por bishita 2 eksposishon den Villa Maria.

E promé eksposishon ta Tula, Historia Kompartí. Esaki a habri riba 3 di òktober ku ta fecha ku a konmemorá ehekushon di lidernan di e lucha pa libertat na 1795.  Kurator Josée Thissen-Rojer a selektá 14 artista pa trese historia di e lucha. Kada artista a skohe un akontesimentu for di e publikashon di Charles Do Rego ‘Sklabitut i Rebelion 1795’. Partisipantenan ta: Giovanni Abath, Ailsa Anastatia, Carl Ariza, Avantia Damberg, Didi Dometilie, Ariadne Faries, Johanna Franco Zapata, Omar Kuwas, Garrick Marchena, Ashley Mauricia, Philip Rademaker, Suzet Rosaria, Ellen Spijkstra i Giovani Zanolino.
Den e eksposishon tin kopia di e karta di shon Caspar van Uytrecht ku tabata doño di plantashi Kenepa, na momentu ku katibunan a disidí di wèlga. Ku e karta Van Uytrecht a pone gobernador na altura ku su katibunan ta ninga di traha riba 17 di ougùstùs 1795. Tekstonan di Charles Do Rego ta kompletá e eksposishon ku informashon konsiso tokante  historia. Di e manera aki Kas di Kultura ta trese un parti importante di nos historia, i ta invitá públiko pa bini bishita e eksposishon.

Den otro sala di Villa Maria por bishita eksposishon ‘Stima otro. Bida di Martie Genger’. Artista visual Martie Genger a bini biba na Kòrsou den 1969. E eksposishon ta relatá bida di Martie for di su hubentut te aworakí. Nos ta sera konosí ku su persona, su filosofia di bida i su eksperenshanan dor di e obranan ku e ta eksponé. Martie ta pensa den konsepto i ta usa e material ku ta kuadra ku lokual e ke trese dilanti. E ta usa tela, chumbu, òf palu. Di mes manera e ta ahustá su téknika na e obra i e material. Apertura di eksposishon di Martie Genger a tuma lugá den Siman di Kultura. Kurator di eksposishon ‘Stima otro. Bida di Martie Genger’, ta Josée Thissen-Rojer di Kas di Kultura.
Stichting Monumentenzorg Curaçao ta spònser di e proyekto aki di Kas di Kultura.
Villa Maria ta keda den Van Den Brandhofstraat na Scharloo Abou. Por bishita e eksposishonnan di djabièrnè 6 di òktober pa djadumingu 8 di òktober 2017, di 9AM pa 4PM. Entrada ta grátis.

Fotógrafo: Josée Thissen-Rojer
Tula, Historia Kompartí:
– ‘Gritu Muda’ di Philip Rademaker,
– ‘The door of no return’ di Ashley Mauricia,
– ‘Vense òf Muri’ di Didi Dometilie.

Stima Otro. Bida di Martie Genger:
– ‘Self portrait of a missing link’
– ‘Como cerrar’.