Manera ta e kustumber tur aña Kas di Kultura ta enkargá ku e apertura di temporada pa gruponan di Tambú, tambe Gaita i Aguinaldo den forma di un Festival Públiko.
Na kaminda pa esaki Kas di Kultura kier ekstendé un invitashon na tur gruponan di Tambú, Gaita i Aguinaldo pa un reunion informativo tokante fecha pa un tayer i tambe e apertura nan.
E reunion nan lo tuma lugá:

Pa Tambú djaluna 27 di ougùstùs 2018 i pa Gaita i Aguinaldo djamars 28 ougùstùs 2018, 8or anochi na Zona Kultural den teater Norman Palm.
Tur Grupo di Tambú, Gaita i Aguinaldo ta keda kordialmente invitá.
Los di esaki Kas di Kultura kier rekordá i enfatisá ku nos tarea prinsipal ta pa organisá e apertura menshoná i tambe e esfuerso pa yuda gruponan ku petishon di pèrmit pa diferente aktividat públiko. Sin embargo tur petishon pa pèrmit ta keda honrá dor di kuerpo polisial su departamento enkargá ku esaki.
E aktividatnan pa habri e temporada di Tambú, Gaita i Aguinaldo lo tuma lugá;

– djadumingu 14 òktober pa gruponan di Gaita i Aguinaldo
– djadumingu 21 òktober pa gruponan di Tambú
Kas di Kultura kier urgi nos komunidat i spesialmente tur esnan ku tradishonalmente ta bishitá e aktividatnan di fin di aña, ku ta masha importante den tur aktividat pa mantené nos mes na órden públiko i un bon komportashon pa por disfrutá di e parti di nos kultura aki di un manera digno.
Nos músika kultural mester keda bibu i p’esei Kas di Kultura ta sigui kere i ta sigui hasi esfuerso pa huntu nos por selebrá tur fin di aña manera generashon nan a kustumbrá.