Muy distinguido Sr. Promé Minister

Ku asombro direktiva di AMAK a tuma nota di e partisipashonnan di bo persona durante di e konferensia di prensa djaluna dia 31 di mei último, durante kua bo persona a anunsiá suavisashon di e medidanan di Covid 19.

Direktiva di AMAK ta kere ku bo a hasi esaki tambe relashoná ku un moshon ku Parlamento di Kòrsou den un forma unánime a bai di akuerdo pa suavisá e medidanan na Kòrsou.

Lamentablemente, direktiva di AMAK no a tuma nota ku ningun momentu a menshoná nada di sektor farandulero. Manera ya ta konosí, músikonan i artistanan durante mas ku un aña a sufri reves finansiero a konsekuensia di e medidanan,

Direktiva di AMAK no por imaginá su mes dikon no por a anunsiá re-apertura di e sektor di Farándula den su totalidat pa motibu di e siguiente faktornan:

1. Gran parti di e pueblo a bakuná, miéntras ku e sifranan di esnan afektá pa e vírus ta bahando satisfaktoriamente i hasta den hospital e kantidat di  pashèntnan di Covid 19 a baha drástikamente;
2. Rònt mundu entre nan Estádos Unídos, Europa i otro paisnan, establesimentunan di horeca, komplehonan deportivo i eventonan kultural musikal ta tumando lugá bou di sierto kondishonnan;
3. Un biaha mas por konstatá ku ta midi ku diferente midí, ya ku djárason 2 di yüni 2021 último, beachclubnan i klupnan na Bapor Kibrá i Mahaai pa menshoná algun, tabata kolmá ku hende i tabata tin aglomerashon sin ta tene kuenta ku kapasidat di 50% ni uso di tapa boka. Direktiva di AMAK su deseo pa e establesimentunan aki sigui funshoná pa asina ei nan por rekobrá e pèrdidanan grandi ku nan a sufri durante di e periodo di Covid 19, pero na e mesun momentu mester habri e posibilidat pa aktividatnan kultural musikal tuma lugá sin tin kuenta di proyektonan piloto. Pregunta: A tene un  proyekto piloto na e klupnan menshoná?
4. Kon por ta posibel ku na paisnan hopi mas grandi ku nos, a suavisá i habri e sektor farandulero sin mester a tene ningun proyekto piloto.

Direktiva di AMAK ta eksihí di Gobièrnu demisionario di Kòrsou, pa habri e sektor farandulero respetando mayoria di Parlamento di Kòrsou, pa nos evitá ku pronto lo tin un kantidat grandi di “Underground Parties”.

Direktiva di AMAK ta spera un reakshon positivo pa evitá akshonnan di e mundu farandulero.