Grupo di Karnaval VaVaVaVoom Berria tambe ta entre e gruponan ku ya ta den ful preparashon, p’asina yuda engrandesé un dje eventonan di mas grandi di Kòrsou ku ta Karnaval. Manera ta konosí, Grupo VaVaVaVoom Berria e aña aki a bolbe partisipá den Karnaval, despues di un ousensia di sinku aña. Grupo VaVaVaVoom Berria a mira e nesesidat pa un re-aparishon, p’asina kontribuí na lokual Karnaval di Kòrsou tabata konosí p’e, esta diseño, fantasia i kolorido, kombiná ku hopi kreatividat. Durante último añanan, hopi grupo a konsentrá muchu mas riba e parti dje ambiente festivo, poniendo ménos énfasis riba e parti di kreatividat di trahenan. VaVaVaVoom Berria komo grupo di Karnaval ta kere ku mester sigui traha riba e parti aki, p’asina mantené Kòrsou su Karnaval komo un dje Karnavalnan di mas kolorido i kreativo den nos region. P’esei otro aña Grupo VaVaVaVoom Berria un biaha mas lo bai estrená un trahe sumamente kolorido, hopi kreativo i ku un kantidat di detaye na dje. E tema di otro aña ku VaVaVaVoom Berria lo presentá, ta “Ora Loka”. Pues ya tur hende por maginá i por ta den espektativa pa loke Grupo VaVaVaVoom Berria lo presentá otro aña. Aporte finansiero Partisipashon den Karnaval ta eksigí un inyekshon finansiero hopi grandi. Tur aña lidernan di grupo mester hasi hopi esfuerso i sakrifisio pa por keda kla ku e parti finansiero. Mas aun komo un grupo ku ta pone hopi énfasis riba e parti dje bistuario, esaki ta pone un preshon aun mas grandi riba e parti finansiero. Diseño di trahenan eksklusivo ta eksigí hopi material kostoso, manera tela, payèt, glitter, metido, pèrla i stenchinan di dekorashon i tambe e kantidat di tela nesesario pa un solo trahe ta hopi, ora ku bo kier presentá algu diferente. Grupo VaVaVaVoom Berria meskos ku diferente otro grupo, a mira e nesesidat ku tabatin pa kumpli ku e demanda i krea un sekshon pa hóbennan studiante i “young professionals”. Dje forma aki por sigui krea i kultivá karnavalistanan hóben ku mentenan inovativo i kreativo. Karnaval ta un evento ku sigur ta kontribuí grandemente den ekonomia di nos pais, ounke VaVaVaVoom Berria no ta mira esaki reflehá bèk den e parti di komèrsio, ku ta kontribuí ku gruponan i asina yuda sigui engrandesé e magno evento kultural aki. P’e motibu ei gruponan mester organisá eventonan pa por rekoudá fondo, di manera ku nan por logra kubri tur gastu pa loke ta nan partisipashon den Karnaval di Kòrsou.
FUNDRAISING
Meskos ku tur otro grupo, VaVaVaVoom Berria tambe ta realisá rekoudashon di fondo. Fuera dje tradishonal benta di lòt, VaVaVaVoom Berria semper ta pensa i trata na presentá kosnan diferente. VaVaVaVoom Berria semper tabata konosí pa su ‘Jump-Inn”. Den pasado tambe VaVaVaVoom tabata e promé grupo pa introdusí “High Tea” aki na Kòrsou. Sinembargo, despues di sinku aña di ousensia, a bini gruponan nobo i otronan ku a sigui desaroyá rondó di tur e ideanan aki. P’esei e aña aki Grupo VaVaVaVoom Berria a pensa pa bini ku un “Festival di Legria Kulinario”. Un evento kual lo tuma lugá djasabra dia 10 di òktober 2015 den Kurá di Museo di Kòrsou, for di 12 or di mèrdia te ku 6 or atardi. Durante e “Festival di Legria Kulinario”, lo bai tin seis diferente stènt di kuminda, di kual unu ta spesialmente dediká na e muchanan i lo sirbi entre otro “hot-dog”, hamburger, salchi-papa i “frietjes”. E sinku otro stèntnan lo ta bou di direkshon di un miembro di grupo. Lo bai tin un stènt bou di direkshon di:
- Suzette Martina ku lo karga e nòmber di “E wea di ambiente”. Invitadonan ta: Cynthia Martina komediante, John Anthony di Zèt 86 i Amarcelly Scoop di LOOP.
- Pheallon Archer ku su tim lo karga e nòmber di “E Grill Loko Loko”. Invitadonan ta: Sherman Antonia di Radio Krioyo i Luis Curiel di EXTRA Farándula.
- Derrick Leitoe ku su tim lo karga e nòmber di “Den Razjiman, Katana na man”. Invitadonan ta: Elia Isenia kulturista, DJ Atley di TCFM i Morgan Isenia di TCFM.
- Donna Yung ku su tim lo karga e nòmber di “Warung Berria”. Invitadonan ta: Franklyn Haseth di TeleCuraçao, Finchi Statia ‘Wòtty di Mangusá’
- Michelin Hooi ku su tim lo karga e nòmber di “Sabor Krioyo Krioyo” Invitadonan ta: Gibi Dorant di MAS 99, Sherwin Kòrá Faneyte di Vigilante Farándula i Sherry Koeyers di Mainta ku Sherry.
Pues lo bai tin kuminda krioyo, manera Vlatapa, Tutu ku bakiyou, Konkòmber chikí, Sòpi, Galiña di smor ku kouseband, Galiña ku aros di koko, Nassi, Bami, Chinese Kip, Pòm, Roti, Brrodje zoutvlees i hopi mas. Por kumpra karchi adelantá serka e miembronan i tambe na MAS 99 na rason di Fl 17,50 Ku e karchi aki mes e persona por drenta e evento i reklamá su plato di kuminda. Lo bai tin un área ku tènt, kaminda bishitantenan lo por sinta disfrutá dje ambiente, kome nan kuminda i dal algu di refreská. Tambe por kumpra karchi na porta òf por paga solamente 2 florin pa mucha i 5 florin pa adulto. VaVaVaVoom Berria sigur no kier keda sin gradisí entre otro Nolly’s Party Services, Serbes Polar, EWT ku su produktonan Kraft i tambe LOVERS, kendenan sin nan aporte e evento aki lo no tabata posibel. VaVaVaVoom Berria kier gradisí tur miembro di prensa pa nan presensia i danki pa duna publisidat na nos próksimo evento.