WILLEMSTAD – Hustamente pasobra ya tur kos ta indiká ku por antisipá atrobe un interes enorme di partisipantenan pa e Ride, Sail, Swim & Walk for the Roses di djadumingu 24 di yanüari, ta rekomendá tur esnan interesá pa inskribí mas tantu posibel di antemano via e wèpsait www.ridefortheroses.net di e fundashon Ride for the Roses. Esnan ku hasi esei por bin kla muchu mas lihé otro siman den un rei spesial na Orco Bank pa pago i entrega di e flanèlnan. Riba e promé dia di inskripshonnan online anteriormente e siman aki ya a registrá un kantidat rèkert di riba 500, loke ta un señal ku e partisipantenan a komprendé su utilidat.

Ta keda posibel tambe pa inskribí na e spònser prinsipal Orco Bank for di djaluna 18 di yanüari te i ku djabièrnè 22 di yanüari di 08:30 or di mainta pa 03:30 di atardi i djasabra 23 di yanüari for di 09:00 or mainta te 04:00 or di atardi na Lanthùis Cerrito (Schottegatweg Oost s/n). Aya mester paga mesora i tin entregá di flanèl. Sinembargo, e inskripshon aya lo rekerí mas tempu. P’esei, for di punto di bista logístiko i di efisiensia ta rekomendabel pa inskribí di antemano online pa e proseso na Orco Bank kana mas zetá.

Aña pasá a lansa un kampaña ku bon resultado pa logra haña mas asina yamá ‘donatùr fiho’ ku un transferensia mensual/anual pa traspasá plaka pa e bon kousa aki. Ku bankonan a kumbiní ku no tin gasta mará na e transakshon spesífiko aki. Esaki ta sigui e aña aki tambe. Na Orco Bank e organisashon tin e formularionan kla pa yena pa un standing order. Grasioso ta ku ta duna tambe inskripshon grátis pa e pago outomátiko periódiko aki.

Tur evento di fundashon Ride for the Roses Curaçao tin komo meta pa alkansá mas tantu hende, pa alkansá mas tantu patrosinador i donatùr ku e ophetivo final pa rekoudá mas tantu plaka posibel pa yuda Fondo Prinsesa Wilhelmina i sostené tur esnan den nan lucha kontra kanser.