E hoben kantante Jennifer Virginia “ Jenny V” ayera ofisialmente a lansa su CD “Amor Solido riba merkado den un enkuentro ku a keda organisá pa Licores Maduro.

E hoben di 24 aña aki, kende a kuminsa den mundu di farandula kantando ku kor “The Angels Voices” , despues ela kanta un tempu ku “Vivienne Frans & Company” i despues pa un temporada di tres aña ela milita den Grupo Karabela.

Na diferente okashon Jenny a profila masha bon mes den Festival di Tumba i te hasta resultá finalista.

Amor Solido:

Na 2ougustus 2012 Jennifer a keda aserká pa Ike Jesurun kende a puntre dikon e no ta graba un CD i asina tur kos a kuminsá. Ora ku nan tabata trahando riba e CD aki, Ike a aserká Sherwin Casper pa traha algun komposishon i for di e dia aki e hoben aki a risibí hopi sosten i konseho di Sherwin Casper. Jenny a biaha pa Repúblika Dominikana na Òktober 2012, kaminda e a graba un merengue ku e galan Eddy Herrera, titulá “Amor Solido”, kual ya ta zonando na tur nos radionan. Awe ku orguyo e hóben aki ta presentá na boso AMOR SOLIDO,  un produkshon musikalmente dirigí pa Ike Jesurun i ku ta konta ku 6 komposishon di Sherwin Casper i tres kansion eksistente i tambe un kansion adaptá pa Jenny mes. E kompakto lo ta karga ku piesanan variá i sigur na nivel. Riba e CD aki Jenny ta tin e privilegio di por a graba kansionnan na duo no solamente ku  Eddy Herrera, sino tambe ku  Rafaelin Hernandez, un kansion ku por sierto ta hiba un bunita mensahe pa tur nos hóbennan. E mensahe ta pa nan no buska e manera fásil pa yega na sèn, pero pa nan traha duru i ku determinashon pa nan por alkansá nan meta i soño nan. Otro di e kantantenan ku Jenny ta interpretá un duo ku ne riba e produkshon aki ta Djuric Virginie, nos rei di tumba 2013. Madrina di e CD tabata su mama Ethlyn Virginia i Padrino Ike Jesurun. Pa kualke presentashon di  Jennifer Virginia por yama telefon: 679 7771