Willemstad – Organisadó Sumusica Curaçao B.V. awe a kanselá ofisialmente e konsierto di Curaçao Ponton Festival durante un konferensia di prensa na ACOYA CURACAO RESORT VILLA’S & SPA.

Djarason anochi a tuma e desishon final despues ku diferente akontesimentu a pone ku finansieramente no ta responsabel pa laga e festival sigui. ‘E ekonomia wantá tin un efekto negativo riba pueblo i esaki a ser notá pa medio di e benta di karchi ku no a bai segun plan’, Gisgard Felida di Sumusica Curaçao B.V. a splika. E organisashon a risibí hopi reakshon positivo di bishitantenan di festival na Kòrsou i den eksterior pa e promé edishon di Curaçao Ponton Festival. Curaçao Ponton Festival lo a tuma lugá 5, 6 i 7 di aprel. Maske e ánimo pa e festival di 3 dia tabata haltu i hopi promoshon a ser hasí via media tradishonal i sosial, benta di karchi a laga hopi di deseá.

Tambe 2 artista prinsipal di djabièrnè anochi a kai afó pa rasonnan imprevisto. Rich Kalashe na lastu momentu no por a presentá mas riba e djabièrnè urbano dia 6 di aprel komo ku e la wòrdu detené na aeropuerto dor di hustisia na Hulanda. Riba e dia en kuestion maneho di Rich Kalash no por a garantisá ku lo e por a duna su presentashon djabièrnè próksimo durante Curaçao Ponton Festival. Djarason último e organisashon ya mester a tuma e desishon difísil di kanselá Ronnie Flex. ‘Nos a purba bini ku solushonnan alternativo pa sòru pa Ronnie Flex i su integrantenan por a bula segun e eksigensianan di nan maneho, pero teniendo kuenta ku nos presupuesto aktual. Mirando ku benta di karchi no a kana segun plan nos mester a tene kuenta ku nos presupuesto mas ahinda. E organisashon ta lamentá kulminashon di e akontesimentunan sinseramente i ta pidí su diskulpa pa tur inkumbiniensia.’

Sumusica Curaçao B.V. lo debolbé sèn di karchi di e festival na tur persona ku ya a kumpra nan karchi. E restitushon lo tuma lugá den faseta. Otro siman e promotor lo duna mas informashon den kòrant i riba página di Facebook di Curaçao Ponton Festival pa ku e restitushon.