WILLEMSTAD — Direktiva di AMAK ta partisipá ku relashoná ku e situashon preokupante di e Pandemia Covid 19,  despues di a konsultá ku e diferente komishonnan, a tuma e desishon pa kanselá Festival di Tumba 2022 definitivamente.

Ta bon pa menshoná aki ku direktiva di AMAK ta sumamente agradesido na tur esnan ku a forma parti di e komishon Festival di Tumba 2022 i ku a duna nan aporte signifikativo durante e vários reunionnan ku a tuma lugá, durante e periodo ku e sifranan di e kontagio di Covid 19 tabata hopi abou i konsekuentemente e posibilidatnan pa tene aktividatnan grandi den aire liber, bou di sierto kondishonnan tabata posibel.

Sinembargo, for di momentu ku na final di desèmber 2021, Gobièrnu a anunsiá e medidanan akonsekuensia di e kontagio ku tabata subiendo drástikamente, ya for di e momentu e tur esnan ku tabata envolví den preparashon pa Festival di Tumba 2022, ya kaba tabata tin nan preokupashon si por a realisá Festival di Tumba 2022.

Direktiva di AMAK ta aploudí ku plantanan di televishon i radio emisoranan ta tokando nos tumbanan, pa asina ei di e forma ei tòg krea un tiki ambiente karnavalesko.

Finalmente nos ke gradesí tambe e branding partnernan ku for di prinsipio ya a konfirmá nan partisipashon i un palabra di gradesimentu tambe ta bai na tur medianan di komunikashon ku semper a konstruí na popularisá nos Tremendo Festival di Tumba.

Na momentu ku e situashon di Covid 19 mehorá, direktiva di AMAK lo bolbe hasi un apelashon riba esnan ku a forma parti di e komishon, pa deliberá riba plannan pa futuro.

Atentamente

Direktiva di AMAK