Djadumingu 16 di mart último a tuma lugá e instalashon di e ocho kandidatanan pa Miss Universe Curaçao 2014. Esaki a sosodé durante un show spektakular den Marriot Hotel & Emerald Casino ku e tema di “Motown”. Ekspertonan den músika ta di opinion ku “Motown” tabata e prekusor di tur e sorto di músika ku nos konosé awe den 2014. Coridja Stars Production a bin ku e idea pa ban bèk un ratu den e tempu dushi kaminda kitara, tròmpèt i drùm tabata e intrsumentonan prinsipal di músika den añanan ’50 i ’60. E ocho damanan ku ta partisipá pa Miss Kòrsou 2014 a duna un presentashon di baile kompañá pa e hóbennan talentoso di D’Art ku den ménos ku 5 aña a pone nan stèmpel den e mundu di baile aki na Kòrsou. Despues di e show di baile, kada un di e damanan e haña e oportunidat pa presentá nan mes na prensa i e públiko ku un spich kaminda nan mester a demonstrá madures, abilidat pa komuniká, spontanidat i personalidat. Huntu ku Minister di Desaroyo Ekonómiko sr. Stanley Palm, e kandidatanan a skohe un pa un, un ramo di flor ku un number, indikando e kandidata su numerashon di partisipashon na Miss Kòrsou 2014.
E sekuensia ofisial di e numerashon ta:

Kandidata # 1  –           Michanou Silvania
Kandidata # 2  –           Laura Meija Muñoz
Kandidata # 3  –           Laurien Angelista
Kandidata # 4  –           Rayandra Eisden
Kandidata # 5  –           Ruënna  Mercelina
Kandidata # 6  –           Naomi Scoop
Kandidata # 7  –           Kaydee Chang
Kandidata # 8  –           Chloë Jansen

Un kuerpo di hurado a husga spontanidat i habilidat komunikativo di kada kandidata i a eligí Laurien Angelista komo Miss Personalidat 2014. E aña aki ta e di dos aña ku Coridja Stars Productions ta organisá Miss Universe Curaçao. E sertamen, meskos ku aña pasá lo tuma lugá 7 di yüni 2014 na Santa Barbara Resort.